‘స‌రిపోదా శ‌నివారం’తో మ‌రో డీసెంట్ హిట్ త‌న ఖాతాలో వేసుకొన్నాడు నాని. గురువారం విడుద‌లైన ‘గోట్‌’ తేడా కొట్ట‌డం ఈ సినిమాకు బాగా క‌లిసొచ్చింది. వినాయ‌క చ‌వితి సెల‌వ‌ల్ని కూడా ‘స‌రిపోదా..’ క్యాష్ చేసుకొంటోంది. మెల్ల‌మెల్ల‌గా ‘స‌రిపోదా…’ బ్రేక్ ఈవెన్ దిశ‌గా ప‌రుగులు పెడుతోంది. ఏపీ, తెలంగాణ‌ల‌లో భారీ వ‌ర్షాలు ఉప్ప‌టికీ ఈ స్థాయి వ‌సూళ్లు అందుకోవ‌డం గొప్పే అనుకోవాలి.
నాని తదుప‌రి సినిమాల లైన‌ప్ కూడా మామూలుగా లేదు. ‘స‌రిపోదా.. శ‌నివారం’ విడుద‌లైన వెంట‌నే ‘హిట్ 3’ ప్ర‌క‌టించేశాడు. `హిట్` అనేది హిట్ ఫ్రాంచైజీ. కాబ‌ట్టి త‌ప్పు జ‌రిగే అవ‌కాశం లేదు. ఈ సినిమాకు నిర్మాత కూడా నానినే. విడుద‌ల‌కు ముందే ఇది ప్రాఫిట్ వెంచ‌ర్ అయ్యే అవ‌కాశాలు ఉన్నాయి. మ‌రోవైపు ద‌స‌రా ద‌ర్శ‌కుడు క‌థ‌తో రెడీగా ఉన్నాడు. నిజానికి ‘హిట్ 3’ కంటే ముందే శ్రీ‌కాంత్ ఓదెల సినిమా ప‌ట్టాలెక్కాలి. కానీ… నాని మ‌న‌సు మార్చుకొని, ‘హిట్ 3’ని లైన‌ప్ చేశాడు. 2025 సంక్రాంతికి శ్రీ‌కాంత్ ఓదెల సినిమా మొద‌ల‌వుతుంది. ఆ తరవాత సుజిత్ తో నాని ఓ సినిమా చేస్తాడు. నాని – సుజిత్ అంటే క్రేజీ కాంబోనే. పైగా ‘ఓజీ’ తరవాత చేసే సినిమా కాబ‌ట్టి అంచ‌నాలు ఓ రేంజ్ లో ఉంటాయి. ‘జెర్సీ’ ఫేమ్ గౌత‌మ్ తిన్న‌నూరి కూడా నాని కోసం ఓ క‌థ రెడీ చేశాడు. శేఖ‌ర్ క‌మ్ముల – నాని కాంబోలో ఓ చిత్రం సెట్స్‌పైకి వెళ్ల‌నుంద‌ని ప్ర‌చారం జ‌రుగుతోంది. ఇవ‌న్నీ పూర్త‌య్యే స‌రికి క‌నీసం 2 ఏళ్ల‌యినా ప‌డుతుంది. మ‌రోవైపు నిర్మాత‌గానూ నాని బిజీనే. ఇటీవ‌లే ప్రియ‌ద‌ర్శితో ‘కోర్ట్’ అనే చిత్రాన్ని ప‌ట్టాలెక్కించాడు. త్వ‌ర‌లోనే నాని బ్యాన‌ర్‌లో మ‌రో సినిమాకు సంబంధించిన ప్ర‌క‌ట‌న రానుంది.
