నాని-సుధీర్ కుమార్ కాంబినేషన్ లో తయారవుతున్న ఇంద్రగంటి మోహన్ కృష్ణ సినిమా ‘ వి ‘. నాని-సుధీర్ ల కాంబినేషన్ అనగానే సినిమా లవర్స్ లో ఓ ఆసక్తి. ఇద్దరు హీరోలతో ఇంద్రగంటి ఏం చేయబోతున్నారా? అని. పైగా విలన్ అని టైటిల్ పెట్టబోయి, వి గా మార్చారని, ఈ వి క్యారెక్టర్ నాని యే చేస్తున్నారని ఆ మధ్య వార్తలు బయటకు వచ్చాయి.
లేటెస్ట్ గా వినిపిస్తున్నదేమిటంటే, నాని ఈ సినిమాలో పక్కా విలన్ గా కనిపిస్తాడన్నది. అతగాడు మర్డర్లు చేస్తూ, చిన్న చిన్న క్లూలు వదులుతూ పోతాడట. వాటి ఆధారంగా సుధీర్ కుమార్ పట్టుకోవడానికి ప్రయత్నిస్తూ వుంటాడట. కానీ అలా అని నాని విలన్ అని అనేసుకోవడానికి వీలు లేదు. ఎందుకంటే నాని కూడా హీరో కదా? అసలు నాని ఎందుకు ఈ మర్డర్లు చేస్తున్నాడన్నది తరువాత తెలుస్తుంది అనుకోవాలి.
ఓ నవల ఆధారంగా ఈ సినిమా తెరకెక్కుతోందని తెలుస్తోంది. దిల్ రాజు నిర్మాణంలోని ఈ సినిమా కోసం బ్యాంకాక్ లో షూటింగ్ స్పాట్స్ కోసం ప్రస్తుతం రెక్కీ చేస్తున్నారు. మరో రెండు రోజుల్లో హైదరాబాద్ లో ఓ షెడ్యూలు స్టార్ట్ చేసి, తరువాత బ్యాంకాక్ వెళ్తారు.
