నారా రోహిత్‌, శ్రీ‌విష్ణు మంచి స్నేహితులు. ఇద్ద‌రి ప్ర‌యాణం ఒకేలా మొద‌లైంది. ఒకేలా సాగుతోంది. శ్రీ‌విష్ణు సినిమాల‌కు నారా రోహిత్ నిర్మాత‌గానూ వ్య‌హ‌రించాడు. ఇద్ద‌రూ క‌ల‌సి చాలా సినిమాల్లో న‌టించారు కూడా. ఇప్పుడు వీరిద్ద‌రూ క‌లిసి మ‌రో సినిమా చేయ‌బోతున్నారు. ఇదో చారిత్ర‌క నేప‌థ్యం ఉన్న క‌థ. స్క్రిప్టు ప‌నులు దాదాపుగా పూర్తి కావొచ్చాయి. ఓ కొత్త ద‌ర్శ‌కుడు ఈ సినిమాతో ప‌రిచ‌యం కాబోతున్నాడు. మిగిలిన న‌టీన‌టులు, సాంకేతిక నిపుణుల వివ‌రాలు త్వ‌ర‌లోనే ప్ర‌క‌టించ‌నున్నారు. ఈ చిత్రానికి శ్రీ‌విష్ణు, నారా రోహిత్ ఇద్ద‌రూ నిర్మాత‌లుగా వ్య‌వ‌హ‌రిస్తార‌ని తెలుస్తోంది. శ్రీ‌విష్ణు సినిమా ‘తిప్ప‌రా మీసం’ ఈ వార‌మే విడుద‌ల కానుంది. ఈ సినిమాపై మంచి అంచ‌నాలు ఏర్ప‌డ్డాయి. ప్రీ రిలీజ్ బిజినెస్ కూడా బాగానే జ‌రిగింది. ఈరోజు విడుద‌ల చేసిన ట్రైల‌ర్ కూడా ఆస‌క్తిక‌రంగానే క‌నిపిస్తోంది. ‘బ్రోచేవారెవ‌రురా’తో ఓ విజ‌యాన్ని అందుకున్న శ్రీ‌విష్ణు.. అదే జోరు ఈ సినిమాలోనూ చూపిస్తాడేమో.