నాట కోడి.. మూడేళ్ల క్రితం సినిమా ఇది. ఈ సినిమా ఒక‌టి ప్రారంభం అయ్యింద‌ని, అందులోశ్రీ‌కాంత్ హీరోగా న‌టించాడ‌ని జ‌నం కూడా మ‌ర్చిపోయారు. బ‌హుశా.. శ్రీ‌కాంత్‌కీ గుర్తుండ‌దు. త‌వ్వ‌కాల్లో బ‌య‌ట‌ప‌డిన‌ట్టు ఈ సినిమాని బ‌య‌ట‌కు లాగారిప్పుడు. నాని కృష్ణ ద‌ర్శ‌క‌త్వం వ‌హించిన ఈ చిత్రంలో కోట, రావు ర‌మేష్ కీల‌క పాత్ర‌లు పోషించారు. శ్రీ‌కాంత్ – నాని కృష్ణ క‌ల‌యిక‌లో ఇది వ‌ర‌కు కృష్ణ‌రాయ వ‌చ్చింది. ఆ సినిమా ఫ్లాప్ అయ్యింది. ఆ వెంట‌నే ఈ సినిమానీ మొద‌లెట్టారు. అయితే.. ఆర్థిక ఇబ్బందుల వ‌ల్ల షూటింగ్ ఆగి.. ఆగి.. సాగి, ఇప్ప‌టికి పూర్త‌య్యింది. పాట‌లు, ట్రైలర్ విడుద‌ల‌య్యాయి. ట్రైలర్ చూస్తుంటే.. ఈ నాటుకోడి ఇంకా ఉడ‌కాలేమో అనిపిస్తోంది కూడా. ఎందుకంటే.. శ్రీ‌కాంత్ త‌న ఎన‌ర్జీ లెవిల్స్ చూపించ‌డానికి చాలా క‌ష్ట‌ప‌డ్డాడ‌నిపిస్తోంది.
నాటుకోడి ట్రైల‌ర్‌లో క‌థ చెప్పిన విధానంచూస్తే టెంప‌ర్‌, ప‌టాస్‌ల కంటే ముందు రావాల్సిన సినిమా అనిపిస్తోంది. ఎందుకంటే ఇది కూడా అవినీతి ప‌రుడైన పోలీస్ అధికారి క‌థే! డైలాగులు, పాట‌లు, ఆర్‌.ఆర్‌… వీటిలో ఎక్క‌డా కొత్త‌ద‌నం క‌నిపించ‌లేదు. చాలా కాలం త‌ర‌వాత శ్రీ‌కాంత్ మాసీ క్యారెక్ట‌ర్ చేయ‌డం.. కోట, రావు ర‌మేష్‌లాంటి ఉద్దండులు క్యారెక్ట‌ర్ ఆర్టిస్టు పాత్రల్లో క‌నిపిస్తుండ‌డం. హీరోయిన్ గ్లామ‌ర్‌, మ‌సాలా డైలాగుతో ఈ ట్రైలర్ నింపేయ‌డంతో బీసీ ఆడియ‌న్స్‌కి ఎక్కితే ఎక్కొచ్చు. హీరోగా రిటైర్ మెంట్ తీసుకోవాల్సిన ఈ వ‌య‌సులో శ్రీ‌కాంత్ చేస్తున్న ప్ర‌య‌త్నం ఎంత వ‌ర‌కూ ర‌క్తి క‌డుతుందో చూడాలి. ఈ సినిమా ఆడిందా స‌రే… లేదంటే శ్రీ‌కాంత్ కెరీర్‌ని మ‌రోవైపుకు ట‌ర్న్ చేసుకోవాల్సిన స‌మ‌యం ఆస‌న్న‌మైన‌ట్టే.
