ఓ పక్క ఉత్కంఠ, మరోపక్క వినోదం… రెండిటిని ప్రేక్షకులకు అందించగలిగితే హిట్టు గ్యారెంటీ. హారర్ ప్లస్ కామెడీ మిక్స్ చేసి ‘గీతాంజలి’తో నిర్మాతగా, రచయితగా హిట్ అనుకున్న కోన వెంకట్ ఈసారి మర్డర్ మిస్టరీకి కామెడీ మిక్స్ చేశారు. ఆది పినిశెట్టి, తాప్సి, రితికా సింగ్ హీరో హీరోయిన్లుగా నటించిన సినిమా ‘నీవెవరో’. హరినాథ్ దర్శకత్వంలో ఎంవివి సత్యనారాయణ నిర్మించిన ఈ సినిమాకి కోన వెంకట్ సమర్పకుడు. కథ, మాటలు కూడా ఆయనవే. ఈరోజు సినిమా టీజర్ విడుదల చేశారు. ఒక్క సంఘటన హీరో జీవితాన్ని ఎలా మలుపు తిప్పిందనే కథతో సినిమా తెరకెక్కిందని టీజర్ చూస్తే అర్థమవుతుంది. ఇందులో ఆది పినిశెట్టి డ్యూయల్ రోల్ చేశాడా? అనిపిస్తుంది. ఎందుకంటే… ఆదికి యాక్సిడెంట్ అవుతుంది. తరవాత ‘ఇది యాక్సిడెంట్ కాదు సర్.. మర్డర్’ అని ఓ డైలాగ్. మర్డర్ చేసిందెవరు? ఎవర్ని చేశారు? అనేది సస్పెన్స్. తరవాత ఆది ఇన్వెస్టిగేట్ టైపులో ఏదో చేస్తున్నాడు. మొత్తం మీద టీజర్‌తో ప్రేక్షకుల్లో ఓ ఆసక్తి అయితే కలిగించారు. మర్డర్ మిస్టరీలో కామెడీకి లోటు లేదన్నట్టు చివర్లో వెన్నెల కిశోర్ చేత ఒక డైలాగ్ చెప్పించారు. ఆది యాక్షన్ కూడా హైలైట్ అయ్యింది.