నిఖిల్ ప్ర‌స్తుతం ‘స్వ‌యంభూ’ అనే సినిమా చేస్తున్న సంగ‌తి తెలిసిందే. ‘కార్తికేయ 2’తో పాన్ ఇండియా ఇమేజ్ సంపాదించుకొన్న నిఖిల్‌… ‘స్వ‌యంభూ’పై భారీ ఆశ‌లు పెట్టుకొన్నాడు. ఈ సినిమా గురించి తెగ క‌ష్ట‌ప‌డుతున్నాడు. నిఖిల్ త‌దుప‌రి సినిమా ‘స్వ‌యంభూ’ అనే అనుకొంటున్న త‌రుణంలో స‌డ‌న్ గా ఓ సినిమా వచ్చి ప‌డుతోంది. అదే ‘అప్పుడో ఇప్పుడో ఎప్పుడో’. సుధీర్ వ‌ర్మ ద‌ర్శ‌క‌త్వం వ‌హించిన సినిమా ఇది. న‌వంబ‌రు 8న విడుద‌ల చేస్తున్నామ‌ని చిత్ర‌బృందం ప్ర‌క‌టించింది. టీజ‌ర్ కూడా విడుద‌ల చేసింది.

అస‌లు ఈ సినిమా ఎప్పుడు మొద‌లైందో, ఎప్పుడు పూర్త‌య్యిందో కూడా ఎవ‌రికీ తెలీదు. క‌రోనా స‌మ‌యంలో మొద‌లై, ఆగిపోయి, ఏదోలా పూర్త‌య్యిన కొన్ని ప్రాజెక్టుల్లో ఇది కూడా ఒక‌టి. ఈ సినిమా గురించి నిఖిల్ కూడా మ‌ర్చిపోయాడు. ఈ సినిమా త‌ర‌వాత సుధీర్ వ‌ర్మ చేసిన `రావ‌ణాసుర‌’ కూడా వ‌చ్చి, వెళ్లిపోయింది. ఇప్పుడు స‌డ‌న్‌గా ‘అప్పుడో ఇప్పుడో ఎప్పుడో’ సినిమాకు పోస్ట్ ప్రొడ‌క్ష‌న్స్ ముగించి, హ‌డావుడిగా విడుద‌ల చేస్తున్నారు. ‘కార్తికేయ 2’తో నిఖిల్ ఇమేజ్ మారింది. ‘స్వ‌యంభూ’ దాన్ని క్యాష్ చేసుకోవాల‌ని చూస్తోంది. అయితే మ‌ధ్య‌లో… ఈ సినిమా రావడం నిఖిల్ ని ఇబ్బంది పెడుతోంద‌ని స‌మాచారం. అప్పుడో ఇప్పుడో ఎప్పుడోలో ఇంకొంత మేర షూట్ చేయాల్సివుంద‌ట‌. అయితే ఆ సీన్లు, పాట‌లూ లేపేశార‌ని, హ‌డావుడిగా సినిమాని పూర్తి చేసి విడుద‌ల చేస్తున్నార‌ని నిఖిల్ టీమ్ పై కాస్త గుర్రుగా ఉన్నాడ‌ని తెలుస్తోంది. అయితే ఇటీవ‌ల విడుద‌లైన టీజ‌ర్ కాస్త డీసెంట్ గానే అనిపించింది. నిఖిల్ లుక్ కూడా బాగుంది. మ‌రి ఇలాంటి స‌మ‌యంలో నిఖిల్ ప్ర‌మోష‌న్ల‌కు వ‌స్తాడా, డుమ్మా కొడ‌తాడా? అనే ఆస‌క్తి నెల‌కొంది. నిఖిల్ ప్ర‌మోష‌న్ల‌లో క‌నిపించే అవ‌కాశాలు లేవ‌ని ఇన్ సైడ్ వ‌ర్గాలు చెబుతున్నాయి. అయితే సుధీర్ వ‌ర్మ‌తో త‌న‌కు మంచి స్నేహం ఉంది. సుధీర్ సినిమా ‘స్వామి రారా’తో నిఖిల్ సాలీడ్ హిట్ కొట్టాడు. అందుకే సుధీర్ కోస‌మైనా నిఖిల్ ప్ర‌మోష‌న్ల‌కు వ‌స్తాడేమో చూడాలి.