ఈ ఎన్నిక‌ల‌లో జ‌బ‌ర్‌ద‌స్త్ షోని మించి కామెడీ పండించాడు కె.ఏ పాల్. అస‌లు పాల్ లేక‌పోతే.. ఈ ఎల‌క్ష‌న్లు బోర్ కొట్టేసేవ‌ని నెటిజ‌న్లు అంటుంటే.. పాల్ ఎంత ఎంట‌ర్‌టైన్మెంట్ పంచాడో అర్థం చేసుకోవొచ్చు. పాల్ హావ‌భావాలు, కామెంట్లు, స్టేట్‌మెంట్లు.. ఎక్క‌డ ఎలా చూసినా.. న‌వ్వులే న‌వ్వులు. పాల్ ఇంట‌ర్వ్యూల‌కు మీడియా పోటీ ప‌డుతోందంటే.. సోష‌ల్ మీడియాలో పాల్ కి ఎంత డిమాండ్ ఉందో అర్థం చేసుకోవొచ్చు.
ఇప్పుడు పాల్ ఇంట‌ర్వ్యూ కోసం ఓ హీరో కూడా ఎగ‌బ‌డుతున్నాడు. త‌నే నిఖిల్. పాల్ ఇంట‌ర్వ్యూ కోసం, అపాయింట్‌మెంట్ కోసం నిఖిల్ ఎదురుచూస్తున్నాడు. నిఖిల్ క‌థానాయ‌కుడిగా న‌టించిన చిత్రం `అర్జున్ సుర‌వ‌రం`. ఇందులో నిఖిల్ పాత్రికేయుడుగా క‌నిపించ‌నున్నాడు. రిపోర్ట‌ర్ల ప‌ని ఇంట‌ర్వ్యూలు చేయ‌డ‌మే క‌దా? అందుకే ఈ సినిమా ప్ర‌చారంలో భాగంగా కె.ఏ పాల్ ని ఇంట‌ర్వ్యూ చేద్దామ‌ని నిఖిల్ ఫిక్స‌య్యాడు. ఈ సినిమా ప్ర‌మోష‌న్ల కోసం ఈ ఇంట‌ర్వ్యూని విరివిగా వాడుకోవాల‌ని చిత్ర‌బృందం గ‌ట్టిగా భావిస్తోంది. ఇప్ప‌టి వ‌ర‌కూ వ‌చ్చిన పాల్ ఇంట‌ర్వ్యూలు ఓ లెక్క.. ఇదో లెక్క‌గా ఉండ‌బోతోంద‌ట. మ‌రి… ఈసారి పాల్ ఎంత వినోదం పండిస్తాడో చూడాలి.
