ఫ్లాపుల మారథాన్‌లో పరుగులు పెట్టిన నితిన్‌ని హిట్ ట్రాక్ ఎక్కించినవి ప్రేమకథలే. హిట్ ట్రాక్‌లో ఉండగా చేసిన యాక్షన్ ఎక్స్‌ప‌రిమెంట్‌ ‘లై’ ప్లాప్ అయ్యింది. ఆ సినిమా తర్వాత నితిన్ చేస్తున్న సినిమా ఫస్ట్ లుక్, టైటిల్ ఈ రోజు ప్రకటించారు. కృష్ణచైతన్య దర్శకత్వంలో నితిన్ హీరోగా నటిస్తున్న సినిమాకు ‘ఛల్… మోహ‌న్‌రంగ’ టైటిల్ కన్ఫర్మ్ చేశారు. హీరోగా నితిన్‌కి 25వ సినిమా ఇది. ఫస్ట్ లుక్ స్టిల్స్ చూస్తుంటే చక్కటి అందమైన ప్రేమకథా చిత్రంగా అనిపిస్తుంది. తనకు బాగా సూట్ అయిన, హిట్స్ వచ్చిన సేఫ్ జోన్ లో నితిన్ ఈ సినిమా చేసినట్టు ఉన్నాడు.

ప్రేమికుల రోజు సందర్భంగా ఫిబ్రవరి 14న ఈ సినిమా టీజర్,ఏప్రిల్ 5న సినిమా విడుదల చేయనున్నట్టు తెలిపారు. ఒక్క పాట మినహా ఈ సినిమా షూటింగ్ పూర్తయింది. మిగిలిన ఆ ఒక్క పాటను ఈ నెల 14 నుంచి హైదరాబాద్;లో షూట్ చేస్తారట. ఇందులో మేఘా ఆకాష్ హీరోయిన్. ‘లై’, ఇప్పుడు ‘ఛల్… మోహ‌న్‌రంగ’… బ్యాక్ టు బ్యాక్ నితిన్ ఈ అమ్మాయితో సినిమాలు చేస్తున్నాడు. నితిన్ అభిమాన హీరో పవన్ కళ్యాణ్, దర్శకుడు త్రివిక్రమ్, నితిన్ తండ్రి సుధాకర్ రెడ్డి ఈ సినిమాను నిర్మిస్తున్నారు. త్రివిక్రమ్ మూల కథను అందించారు. తమన్ ఈ చిత్రానికి సంగీత దర్శకుడు.