నితిన్ ప‌వ‌న్ క‌ల్యాణ్‌కి అతి పెద్ద భ‌క్తుడు. ప‌వ‌న్ క‌ల్యాణ్ రిఫ‌రెన్సులు నితిన్ సినిమాల్లో ఎక్కువ‌గా క‌నిపిస్తుంటాయి. ప‌వ‌న్‌ని నితిన్ వాడినంత‌గా మిగిలిన మెగా హీరోలు కూడా వాడ‌లేదంటే అతిశ‌యోక్తి కాదు. మ‌రి నితిన్ రాబోయే సినిమా `చెక్‌`లోనూ ప‌వ‌న్ ని గుర్తు చేసేలా సీన్లేమైనా పెట్టాడా? ప‌వ‌న్ రిఫరెన్సులు ఉన్నాయా? వీటిపై నితిన్ స్పందించాడు. ”ప‌వ‌న్ క‌ల్యాణ్ గారిని ఎక్క‌డా గుర్తు చేయ‌లేదు. ఆయ‌న్ని వాడుకోలేదు. ఎందుకంటే ఈ క‌థ అలాంటిది కాదు. జైల్లో ప‌వ‌న్ క‌ల్యాణ్ గారి ఫొటో పెడితే బాగోదు క‌దా..” అని స‌ర‌దాగా వ్యాఖ్యానించాడు నితిన్‌.

అయితే త‌ను మ‌ల్టీస్టార‌ర్ సినిమా చేస్తే… తొలి ఛాయ‌స్ ప‌వ‌న్ క‌ల్యాణే అన్నాడు. ”మ‌ల్టీస్టార‌ర్ సినిమాలు చేయాల‌నివుంది. ఏ హీరోతో సినిమా చేస్తావు అని ఏ ద‌ర్శ‌కుడైనా ఆఫ‌ర్ ఇస్తే.. నేను ప‌వ‌న్ క‌ల్యాణ్ గారి పేరే చెబుతా. ఆ అవ‌కాశం కోసం ఎదురు చూస్తున్నా” అన్నాడు. ఇటీవ‌ల‌… ప‌వ‌న్ – నితిన్‌ల‌తో ఓ మ‌ల్టీస్టార‌ర్ వ‌స్తుంద‌ని ప్ర‌చారం జ‌రిగింది. బహుశా ఆ సినిమా నిజంగానే పైప్ లైన్‌లో ఉందేమో..? అదే నిజ‌మైతే.. నితిన్ కెరీర్‌లో అది మ‌రో మైల్ స్టోన్ చిత్రం అవుతుంది.