‘బ‌ల‌గం’ సినిమాతో ద‌ర్శ‌కుడిగా త‌న‌ని తాను నిరూపించుకొన్నాడు వేణు. ఆ సినిమాకు అవార్డులతో పాటు, మంచి వ‌సూళ్లూ ద‌క్కాయి. ఇప్పుడు త‌న రెండో సినిమా ప్ర‌య‌త్నాల్లో బిజీగా ఉన్నాడు. నానితో వేణు ఓ సినిమా చేస్తున్నాడ‌న్న ప్ర‌చారం జ‌రిగింది. నాని కూడా వేణుతో సినిమా చేయ‌డానికి ఆస‌క్తి చూపించాడు. కానీ.. నాని క‌మిట్‌మెంట్స్ వ‌ల్ల వేణుకి మాట ఇవ్వ‌లేక‌పోయాడు. ఈలోగా వేణు ‘ఎల్ల‌మ్మ’ అనే క‌థ త‌యారు చేసుకొన్నాడు. దిల్ రాజు బ్యాన‌ర్‌లో ఈ చిత్రం రూపుదిద్దుకోనుంది. ఇందులో హీరో కోసం కొన్నాళ్లుగా వేణు గ‌ట్టి ప్ర‌య‌త్నాలు చేస్తున్నాడు. నితిన్, శ‌ర్వానంద్ లాంటి హీరోల‌కు క‌థ చెప్పాడు. చివ‌రికి నితిన్ ఓకే అయ్యాడు. అతి త్వ‌ర‌లోనే ఈ ప్రాజెక్టుకు సంబంధించిన అధికారిక ప్ర‌క‌ట‌న రానుంది.
‘బ‌ల‌గం’లానే ‘ఎల్ల‌మ్మ’ కూడా తెలంగాణ నేప‌థ్యంలో సాగేదే. తెలంగాణ సంస్కృతి, మ‌ట్టివాస‌న ఈ కథలో క‌నిపించ‌నున్నాయి. ‘కాంతార’ త‌ర‌హాలో బ‌ల‌మైన క్లైమాక్స్ ఈ కథలో ఉంద‌ని తెలుస్తోంది. ప్ర‌స్తుతం స్క్రిప్టు ప‌నులు జ‌రుగుతున్నాయి. నితిన్ ‘త‌మ్ముడు’, ‘రాబిన్‌వుడ్‌’ సినిమాల‌తో బిజీగా ఉన్నాడు. అవి పూర్త‌యిన వెంట‌నే ‘ఎల్ల‌మ్మ’ సెట్స్ పైకి వెళ్తుంది. ఈ కథలో క‌థానాయిక పాత్ర‌కూ చాలా ప్రాధాన్యం ఉంద‌ని తెలుస్తోంది. ఆ పాత్ర కోసం స్టార్ హీరోయిన్‌నే తీసుకొనే అవ‌కాశాలు ఉన్నాయి.
