చిత్ర‌సీమ‌లో ప‌వ‌న్‌కి వీరాభిమాని అన‌బ‌డే భ‌క్తుడు.. నితిన్‌. ఈ విష‌యాన్ని నితిన్ చాలా సార్లు, చాలా గ‌ర్వంగా చెప్పాడు. ప‌వ‌న్‌కి కూడా నితిన్ అంటే ప్ర‌త్యేక‌మైన అభిమానం. అయితే ఈ అభిమానం కేవ‌లం సినిమాల వ‌ర‌కేనా? ప‌వ‌న్ క‌ల్యాణ్ పార్టీకి కూడా నితిన్ స‌పోర్ట్ చేస్తాడా? ఇదే ప్ర‌శ్న‌కు నితిన్ చాలా తెలివిగా స‌మాధానం చెప్పేశాడు. ప‌వ‌న్‌కి త‌న స‌పోర్ట్ అవ‌స‌రం లేద‌ని, ఆయ‌న ఎవ‌రి అండ‌లేకుండానే విజ‌యం సాధిస్తార‌ని మ‌రోసారి త‌నకున్న అభిమానాన్ని చాటుకొన్నాడు.

నితిన్ సినిమాల్లో ప‌వ‌న్ క‌ల్యాణ్ రిఫ‌రెన్సులు ఎక్కువ‌గా క‌నిపిస్తుంటాయి. త‌న కొత్త సినిమా `ఎగ‌స్ట్రా – ఆర్డ‌న‌రీమెన్‌`లోనూ ఆ ఛాన్స్ ఉంది. ఈ సినిమాలో నితిన్ ఓ జూనియ‌ర్ ఆర్టిస్టుగా న‌టించ‌బోతున్న సంగ‌తి తెలిసిందే. బాహుబ‌లిలోని ఓ సీన్‌లో నితిన్ క‌నిపించిన‌ట్టు చిన్న మ్యాజిక్ చేసి చూపించారు ట్రైల‌ర్‌లో. అలాంటి సీనే.. ప‌వ‌న్ సినిమాకి సంబంధించి ఉంద‌ని, ప‌వ‌న్‌, నితిన్ క‌లిసి న‌టించిన‌ట్టు ఓ సీన్‌లో సీజీ ద్వారా మ్యాజిక్ చేశార‌ని ఇన్ సైడ్ వ‌ర్గాల టాక్‌. అయితే ఈ విష‌యాన్ని చిత్ర‌బృందం వెల్ల‌డించ‌డం లేదు. దాన్ని ఓ స‌ర్‌ప్రైజ్‌గానే ఉంచాల‌ని భావిస్తోంది.