డిసెంబ‌రు 20… చాలాకాలంగా రామ్ చ‌ర‌ణ్ అభిమానుల్ని ఊరించిన డేట్ ఇది. ‘గేమ్ ఛేంజ‌ర్’ ఇదే రోజున వ‌స్తుంద‌ని అంతా ఆశించారు. అయితే… ‘గేమ్ ఛేంజ‌ర్‌’ కాస్త సంక్రాంతికి వాయిదా ప‌డింది. ఇప్పుడు డిసెంబ‌రు 20 ఖాళీ. ఈ డేట్ ని క్యాష్ చేసుకోవ‌డానికి చాలా సినిమాలు ప్ర‌య‌త్నిస్తున్నాయి. డిసెంబ‌రు 20న నితిన్ సినిమా ‘రాబిన్‌వుడ్’ కూడా రాబోతోంద‌ని ప్ర‌చారం జ‌రిగింది. ఇప్పుడు అదే నిజ‌మైంది. డిసెంబ‌రు 20న రాబిన్‌వుడ్ ని విడుద‌ల చేస్తున్న‌ట్టు నిర్మాత‌లు ప్ర‌క‌టించారు.

నితిన్ – శ్రీ‌లీల జంట‌గా న‌టించిన సినిమా ఇది. వెంకీ కుడుముల ద‌ర్శ‌కుడు. మైత్రీ మూవీస్ సంస్థ నిర్మించింది. ప్ర‌స్తుతం షూటింగ్ జ‌రుగుతోంది. రెండు పాట‌లు, ఆరు రోజుల షూటింగ్ మాత్ర‌మే బాలెన్స్ వుంది. నవంబ‌రు మొద‌టి వారంలో టీజ‌ర్ విడుద‌ల చేస్తామ‌ని నిర్మాత‌లు తెలిపారు. జి.వి.ప్ర‌కాష్ కుమార్ ఈ చిత్రానికి సంగీతాన్ని అందిస్తున్నారు. త్వ‌ర‌లోనే ఫ‌స్ట్ సింగిల్ రిలీజ్ చేసే ఆలోచ‌న‌లో ఉంది చిత్ర‌బృందం.

నిజానికి డిసెంబ‌రు 20 మంచి డేట్. క్రిస్మ‌స్ సెల‌వ‌లు క‌లిసొస్తాయి. లాంగ్ వీకెండ్ అద‌న‌పు అడ్వాంటేజ్‌. అందుకే ‘గేమ్ ఛేంజర్‌’ని బ‌రిలో నిల‌పాల‌ని అనుకొన్నారు. ఇదే రోజున మ‌రిన్ని సినిమాలు పోటీకి నిలిచే అవ‌కాశాలు ఉన్నాయి. అవేంట‌న్న‌ది వారం రోజుల్లో ఓ క్లారిటీ వ‌స్తుంది.