కేంద్రంలో బీజేపీ సర్కారు ఉంది, రాష్ట్రంలో తెలుగుదేశం సర్కారు ఉంది.. రెండూ మిత్రపక్షాలే కావడంతో ఈ రెండింటి కాంబినేషన్ ఏపీని అభివృద్ధి బాట పట్టిస్తుందని చాలా మంది ఆశించారు. ఈ విషయాన్నే గట్టిగా చెప్పారు బీజేపీ, తెలుగుదేశం నేతలు. రాష్ట్రంలో, కేంద్రంలో తమ కాంబినేషన్ ను ఎన్నుకుంటే ఏపీకి తిరుగే ఉండదని వీరు చెప్పుకొచ్చారు. ఏపీ ప్రజల ఆశలు కూడా అవే అయినా.. అసలు వ్యవహారం మాత్రం మరో రకంగా ఉంది. ఇప్పటి వరకూ విభజన చట్టంలో పేర్కొన్న అంశాల పై కేంద్రం వ్యవహఱించిన తీరు సరిగా లేదు. అలాగే ఈ విషయంలో కేంద్రంపై ఒత్తిడి తీసుకురావడంలో కూడా చంద్రబాబు ప్రభుత్వం విఫలమైందని స్పష్టం అవుతోంది.
ప్రత్యేక హోదా, విభజన చట్టంలో పేర్కొన్న ఆర్థిక లోటు పూడ్చడం వంటి అంశాల పై ఇప్పటికే చాలా రచ్చ జరిగింది తప్ప ఏపీకి ఒరిగింది ఏమీ లేదు. కొంతలో కొంత బెటర్ ఏమిటంటే.. ఏపీ లో వెనుకబడిన జిల్లాలకు కేంద్రం నిధులు కేటాయించడం. విభజన చట్టం ప్రకారం ఉత్తరాంధ్ర, సీమలోని మొత్తం ఏడు జిల్లాలకు ఏడువందల కోట్ల రూపాయలు విడుదల చేసింది. ఇప్పుడు ఆ నిధుల విషయంలో నీతి ఆయోగ్ స్పందించింది. వీటిని చంద్రబాబు ప్రభుత్వం పక్కదారి పట్టించిందని ఆ కేంద్ర సంస్థ వ్యాఖ్యానించింది. ఇది సరికాదని స్పష్టం చేసింది. దీనిపై తనిఖీలు చేపడతామని కూడా నీతి అయోగ్ వ్యాఖ్యానించింది.
మరి ఈ నిధుల పక్కదారి పట్టిన విధానం గురించి పరిశీలిస్తే.. రాయలసీమ జిల్లాల్లో ఈ నిధులను చెట్లు నాటడానికి వాడేశారు! నీరు చెట్టు అంటూ ఈ నిధులను వాడారు. ఈ కార్యక్రమం మంచిదే అయినా విమర్శలు తప్పలేదు. చెట్లు నాటడానికి నిధుల దుర్వినియోగం చేశారని ఆరోపణ. చెట్ల సంఖ్య విషయంలో తప్పుడు లెక్కలు చూపడం, వంద చెట్లు నాటి వెయ్యి నాటమని చెప్పడం, వాటి సంరక్షణకు అంటూ తెలుగుదేశం కార్యకర్తలకు నిధులు కేటాయించడం జరిగింది. ఈ విధంగా వెనుకబడిన రాష్ట్రాల్లో అభివృద్ధికి అంటూ కేటాయించిన నిధులను అటు తిప్పి ఇటు తిప్పి తెలుగుదేశం అనుకూలుర జేబుల్లోకి చేర్చిన విధానం ఇది. మరి ఇప్పుడు నీతి అయోగ్ గట్టిగానే స్పందిస్తోంది. ఈ విషయం ఎక్కడి వరకూ వెళ్తుందో చూడాలి.
