రూ. 338 కోట్ల రూపాయల లావాదేవీలపై ఆధారాలను ఈడీ సమర్పించినందున ఆప్ నేత, మాజీ డిప్యూటీ సీఎం మనీష్ సిసోడియాకు సుప్రీంకోర్టు బెయిల్ నిరాకరించింది. బెయిల్ పిటిషన్ పై గతంలోనే విచారణ పూర్తయింది. ఇవాళ తీర్పు వెలువరించింది. సిసోడియా దాఖలు చేసిన బెయిల్ పిటిషన్‌ను సుప్రీంకోర్టు తిరస్కరించింది. సిసోడియాపై సెంట్రల్ బ్యూరో ఆఫ్ ఇన్వెస్టిగేషన్ (సీబీఐ), ఎన్ఫోర్స్మెంట్ డైరెక్టరేట్ (ఈడీ) దర్యాప్తు చేస్తున్న కేసులపై జస్టిస్ సంజీవ్ ఖన్నా, జస్టిస్ ఎస్వీఎన్ భట్టిలతో కూడిన ధర్మాసనం తీర్పు వెలువరించింది.

ఢిల్లీ ఎక్సైజ్ పాలసీ, సిసోడియాపై ఉన్న కేసులకు సంబంధించి సుప్రీంకోర్టు గతంలో సీబీఐ, ఈడీలకు పలు ప్రశ్నలు సంధించింది. మద్యం కుంభకోణానికి సంబంధించి సిసోడియా ఫిబ్రవరి నుంచి జైలులో ఉన్నారు. సిసోడియా బెయిల్ పిటిషన్ పై సుప్రీంకోర్టు ఈ నెల ప్రారంభంలో వాదనలు వినింది. తర్వాత తీర్పును రిజర్వ్ చేసింది. తనపై రెండు వేర్వేరు కేసుల్లో బెయిల్ మంజూరు చేయాలని సిసోడియా కోరారు. సిసోడియాపై విచారణను ఆరు నుంచి ఎనిమిది నెలల్లో పూర్తి చేయాలని కోర్టు ఆదేశించింది. విచారణ ప్రక్రియ మందకొడిగా కొనసాగితే సిసోడియా మూడు నెలల్లోగా మళ్లీ బెయిల్ పిటిషన్ దాఖలు చేసే అవకాశం ఉంటుంది.

ఢిల్లీ లిక్కర్ స్కాంలో చాలా మందిని ఈడీ, సీబీఐ అరెస్టు చేసింది. సౌత్ లాబీ నుంచి చాలా మందిని అరెస్టు చేశారు. మనీ రూటింగ్ జరిగిందని చార్జిషీట్లలో పేర్కొన్నారు. అయితే దాదాపుగా అందరూ అప్రూవర్లు అయ్యారు. ఒక్క కవిత మాత్రమే బయట ఉన్నారు. ఆమెపై విచారణను నవంబర్ వరకూ సుప్రీంకోర్టు ఆపేసింది. ముందు ముందు ఢిల్లీ లిక్కర్ కేసులో కీలక పరిణామాలు చోటు చేసుకునే అవకాశం ఉంది.