తెలంగాణలో ఒకే సారి పదకొండు మంది ఐఏఎస్ అధికారులను బదిలీ చేశారు. ముందస్తు కసరత్తులో భాగంగా.. అధికార ప్రక్షాళనలో ఇవి తొలి నిర్ణయాలు. ఇంకా పోలీసులు అధికారులు, రెవిన్యూ అధికారుల బదిలీలు పెద్ద సంఖ్యలో ఉండనున్నాయి. పది మంది కలెక్టర్లను కూడా మార్చారు. కొంత మందికి తిరిగి ఇతర జిల్లాల్లో కలెక్టర్లుగానే పోస్టింగ్ ఇచ్చారు. కానీ.. అనూహ్యంగా… వరంగల్ అర్బన్ కలెక్టర్ కాట అమ్రపాలిని బదిలీ చేశారు కానీ పోస్టింగ్ మాత్రం ఇవ్వలేదు. చురుకైన అధికారిగా… పేరు తెచ్చుకున్న కలెక్టర్ అమ్రపాలి.. బదిలీ అవుతారని ఎవరూ అనుకోలేదు. కానీ ఆమె బదిలీ అవడమే కాదు..మరో చోట పోస్టింగ్ కూడా తెచ్చుకోలేకపోయారు.

ఎన్నికల సమయంలో కలెక్టర్లు అత్యంత కీలకమైన పాత్ర పోషిస్తారు. వారే జిల్లా స్థాయి రిటర్నింగ్ అధికారులుగా వ్యవహరిస్తారు. అందుకే ముందస్తుగా అధికార పార్టీలు ఎన్నికల సమయంలో… తమకు అత్యంత నమ్మకస్తులైన వారినే.. కలెక్టర్లుగా నియమించుకుంటూ ఉంటాయి. ముందస్తుకు వెళ్లాలనుకున్న.. టీఆర్ఎస్ ప్రభుత్వం కూడా ఇదే పని చేసింది. అయితే.. అమ్రపాలిపై .. ప్రభుత్వం ఎందుకు నమ్మకం కోల్పోయిందనేది.. ఎవరికీ అర్థం కావడం లేదు. బహుశా ఆమె..ఆంధ్రప్రాంతానికి చెందిన వారనే కారణంతో… కలెక్టర్ పోస్టు నుంచి తప్పించారన్న ప్రచారం తెలంగాణ అధికార వర్గాల్లో జరుగుతోంది. అమ్రపాలికి తర్వాత విడత ఉత్తర్వుల్లో ఏదో ఓ పోస్టింగ్ వచ్చే అవకాశం ఉంది.

వచ్చే రెండు, మూడు రోజలు పాటు.. తెలంగాణలో బదిలీల జాతర నడవనుంది. ఆలిండియా సర్వీసుల అధికారుల సర్వీసుల్లో అందరూ.. తెలంగాణ వాళ్లే ఉండరు. కానీ ఏపీ వాళ్లు ఉంటే.. మాత్రం.. టీఅర్ఎస్ తన వంతుగా దూరం పెట్టే అవకాశాలున్నాయన్న ప్రచారం జరుగుతోంది. ముందస్తు ఎన్నికలకు అత్యంత ప్రతిష్టాత్మకంగా తీసుకుంటున్న కేసీఆర్ ఏ చిన్న విషయాన్ని వదిలి పెట్టడం లేదు. అందుకే సిన్సియర్‌గా పేరున్న వారిని కాకుండా.. విధేయులుగా ఉన్న వారినే ప్రస్తుతం కీలక పోస్టుల్లో పెడుతున్నారన్న అభిప్రాయాలు వ్యక్తమవుతున్నాయి.