హీరోయిన్ పాత్ర‌ల‌కంటే వ్యాంపు త‌ర‌హా పాత్ర‌ల‌కు భ‌లే సెట్ట‌యిపోతుంది పాయ‌ల్ రాజ్‌పుత్‌. `ఆర్‌.ఎక్స్ 100`లో కూడా ఆ పాత్ర ని దాదాపుగా అలానే డిజైన్ చేశాడు అజ‌య్ భూప‌తి. ఐటెమ్ గీతాల‌కు.. త‌ను మంచి ఆప్ష‌న్ కూడా. అందుకే `పుష్ష`, `భార‌తీయుడు 2` చిత్రాల‌లో పాయ‌ల్‌ని ఐటెమ్ గీతాల కోసం ఎంచుకున్నార‌ని ప్ర‌చారం జ‌రిగింది. పుష్ష సంగ‌తి ఎలా ఉన్నా – భార‌తీయుడు 2 లాంటి క్రేజీ ప్రాజెక్టులో పాయ‌ల్‌కి ఛాన్స్ రావ‌డం చూసి అంద‌రూ ఆశ్చర్య‌పోయారు. ఈ సినిమాతో పాయ‌ల్ ద‌శ తిరుగుతుంద‌ని భావించారు.
అయితే… ఈ వార్త‌ల‌పై ఇప్పుడు పాయ‌ల్ స్పందించింది. తాను ఏ సినిమాలోనూ, ఐటెమ్ గీతాలు చేయ‌డం లేద‌ని, అలాంటి ఆఫ‌ర్లు రాలేద‌ని క్లారిటీ ఇచ్చింది. అంతేకాదు.. భ‌విష్య‌త్తులోనూ ఐటెమ్ గీతాలు చేయ‌డానికి రెడీగా లేన‌ని, క‌థానాయిక‌గా మంచి పాత్ర‌ల కోసం చూస్తున్నాన‌ని చెప్పేసింది. ఇప్ప‌టికే త‌నపై వ్యాంపు, ఐటెమ్ గాళ్ ముద్ర ప‌డిపోయింది. వాటిని తొల‌గించుకోవాల‌ని పాయ‌ల్ ఇప్పుడు భావిస్తోంది. కాక‌పోతే.. త‌మ‌న్నా లాంటి స్టార్ హీరోయిన్లే ఐటెమ్ గీతాల‌కు సై అంటున్నారు. అలాంటి పాట‌ల‌తోనూ క్రేజ్ సంపాదించుకుంటున్నారు. క‌మ‌ల్‌, బ‌న్నీ సినిమాల్లో ఐటెమ్ గీతాల అవ‌కాశం రావ‌డం… చిన్న విష‌య‌మేం కాదు. కానీ.. పాయ‌ల్ మాత్రం అందుకు రెడీగా లేనంటోంది.
