ఆంధ్రప్రదేశ్ ప్రభుత్వం మూడు మద్యం బాటిళ్లను తీసుకెళ్లే వెసులుబాటును రద్దు చేసింది. ఈ మేరకు ప్రత్యేకంగా జీవో తీసుకు వచ్చింది. ఏపీలోకి పొరుగు రాష్ట్రాలకు సంబంధించిన ఎలాంటి మధ్యం తీసుకు రావడానికి వీల్లేదని స్పష్టం చేస్తూ ఉత్తర్వులు జారీ చేసింది. నిజానికి ఏపీలో కొత్త ప్రభుత్వం ఏర్పడిన తర్వాత మొత్తం మద్యం విధానాన్ని మార్చేశారు. అప్పుడు కూడా.. ప్రభుత్వం ఎలాంటి వెసులుబాటు ఇవ్వలేదు. కానీ.. జీవో జారీ చేసే సమయంలో.. ‌అవగాహనా రాహిత్యంతో వ్యవహిరంచడంతో మందుబాబులు దాన్ని తమకు అనుకూలంగా మల్చుకున్నారు. ఎవరైనా మూడు లీటర్ల మద్యాన్ని ఉంచుకోవచ్చని.. రవాణా చేసుకోవచ్చని.. ప్రభుత్వం జీవోలో చెప్పింది. అది ఎక్కడి మద్యం అనేది మాత్రం క్లారిటీ ఇవ్వలేదు.

అయినప్పటికీ.. ఒక్క బాటిల్ తెచ్చుకుంటున్నా పోలీసులు పట్టుకుని కేసులు నమోదు చేశారు. దీనిపై వారంతా కోర్టుల్లో కేసులు వేశారు . ప్రభుత్వ ఉత్తర్వుల ప్రకారమే.. తాము… మద్యం తెచ్చుకుంటున్నా కేసులు వేస్తున్నారని వారు వాదించారు . జీవోను పరిశీలించిన హైకోర్టు.. జీవో ప్రకారం మూడు మద్యం బాటిళ్లు తెచ్చుకోవచ్చంటూ పర్మిషన్ ఇచ్చింది. అప్పటి నుండి… ఏపీలోకి మూడు మద్యం బాటిళ్లు తీసుకెళ్లేవాళ్లు ఎక్కువైపోయారు.

ప్రభుత్వం ఈ నిబంధనను మార్చడానికి ప్రత్యేకంగా జీవో తేవాలని నిర్ణయించుకుంది. ఇప్పటికి ఆ జీవో విడుదలైంది. కొసమెరుపేమిటంటే… విదేశాల నుంచి మాత్రం.. మద్యం తెచ్చుకోవచ్చు. దానికి సంబంధించిన కేంద్ర ప్రభుత్వ నిబంధనల ప్రకారం… విదేశాల నుంచి తెచ్చుకునే మద్యాన్ని ఏపీలోకి అనుమతిస్తారు. కానీ పొరుగురాష్ట్రాల పెయిడ్ లిక్కర్‌ను మాత్రం… అనుమతించరు. దొరికితే కేసులు పెడతారు