ఆంధ్రప్రదేశ్ ప్రభుత్వం విపరీతంగా అప్పులు చేస్తోందని కాగ్ రిపోర్టులు వెల్లడిస్తున్నాయి. అవన్నీ కాగ్ పరధిలోకి వచ్చే అప్పులు. కానీ ప్రభుత్వం ముసుగులో గుద్దులాటలుగా.. పెద్ద ఎత్తున ఇతర పద్దతుల్లో అప్పులు చేస్తోందన్న ఆరోపణలు వినిపిస్తున్నాయి. కేంద్రానికి ఆ ఏడాది చేసిన అప్పుల వివరాలు మొత్తం ఇస్తేనే.. తదుపరి అప్పులు చేసుకోవడానికి పర్మిషన్ ఇస్తుంది. కానీ ఏపీ సర్కార్ ఇంత వరకూ అప్పుల వివరాలు ప్రకటించలేదు. కేంద్రానికి పంపలేదు. దీంతో ఈ ఆర్థిక సంవత్సరం కొత్త అప్పులు చేయడానికి ఏపీ సర్కార్‌కు అవకాశం చిక్కడం లేదు.

నిజానికి కేంద్రం ఈ సారి ఏపీ సర్కార్‌కు భారీగా రుణం తీసుకునే అవకాశాన్ని కల్పించింది. ఆర్బీఐ నుంచి బాండ్ల ద్వారా ఏకంగా రూ. 42వేల కోల్ల రుమం తీసుకునే అవకాశాన్ని కల్పించింది. కానీ ఈ రుణం తీసుకోవాలంటే కొన్ని నిబంధనలు పూర్తి చేయాలి. గత ఆర్థిక సంవత్సరంలో చేసిన అప్పుల వివరాలు, గ్యారంటీల ద్వారా తెచ్చిన అప్పుల వివరాలు, అందులో రెవెన్యూ వ్యయం ఎంత.. పెట్టుబడి వ్యయం ఎంత..చెప్పాల్సి ఉంటుంది. అయితే ఇది రహస్యం అనుకున్నారేమో కానీ… ఏపీ పూర్తిస్థాయిలో కాకుండా తాత్కాలికంగా కొంత సమాచారాన్ని కేంద్రానికి పంపింది. ఈ వివరాలను కేంద్రం పరిగణనలోకి తీసుకోలేదు. అందుకే పర్మిషన్ ఇవ్వలేదు.  

జీతాలు, పెన్షన్లకుకూడా.. అప్పుల మీదే ఆధారపడే పరిస్థితి వచ్చిందంటే.. ఇది దివాలా దశేనని.. ఆర్థిక నిపుణులతో పాటు విపక్ష నేతలు మండిపడుతున్నారు. ఏపీ ఆర్థిక పరిస్థితిపై శ్వేతపత్రం విడుదల చేయాలని డిమాండ్ చేస్తున్నారు. కొన్ని వేల కోట్లు అప్పులు చేస్తున్నా… పెండింగ్ బిల్లులు అలాగే ఉండిపోతున్నయని.. తీసుకొస్తున్న అప్పులు.. వస్తున్న ఆదాయం అంతా ఏం చేస్తున్నారో చప్పాలని డిమాండ్ చేస్తున్నారు. కానీ ప్రభుత్వం వైపు నుంచి ఉలుకు.. పలుకు ఉండటం లేదు.