2019 సంక్రాంతికి ఎన్టీఆర్ బయోపిక్‌ విడుదల చేయాలనేది బాలకృష్ణ సంకల్పం. దర్శకుడు క్రిష్ జాగర్లమూడి అందుకు తగ్గట్టు శరవేగంగా చిత్రాన్ని తెరకెక్కిస్తున్నారు. మరోపక్క క్రిష్ దర్శకత్వం వహిస్తున్న హిందీ చిత్రం ‘మణికర్ణిక’ కూడా 2019 జనవరిలో గణతంత్ర దినోత్సవం సందర్భంగా 25న విడుదలకు సిద్ధమవుతోంది. అయితే… కంగనా రనౌత్ టైటిల్ రోల్‌లో ఝాన్సీ లక్ష్మీభాయిగా నటిస్తున్న ఆ సినిమా చిత్రీకరణ పూర్తి కాలేదు. ప్రస్తుతం ప్యాచ్‌వ‌ర్క్‌ జరుగుతోంది. అదీ క్రిష్ గైర్హాజరులో! ‘యన్.టి.ఆర్’ పనుల్లో తలమునకలైన క్రిష్, ‘మణికర్ణిక’ చిత్రానికి సరైన సమయం కేటాయించలేకపోతున్నారు. దాంతో రచయితలు విజయేంద్ర ప్రసాద్, ప్రసూన్ జోషి సహకారంతో కంగనా రనౌత్ చిత్రాన్ని పూర్తిచేసే బాధ్యతను చేపట్టారు. ఆమెతో క్రిష్ ప్రతిరోజూ ఫోనులో మాట్లాడుతున్నారని, తమతో ఆయ‌న ట‌చ్‌లోనే వున్నారని ‘మణికర్ణిక’ టీమ్ చెబుతోంది. మధ్య మధ్యలో క్రిష్ ముంబై వెళ్లి వస్తున్నారు. ఎప్పటికప్పుడు నిర్మాణాంతర కార్యక్రమాల్ని పర్యవేక్షిస్తూ హిందీ చిత్రబృందానికి అందుబాటులో వుంటున్నారు.