ఎన్టీఆర్ – త్రివిక్ర‌మ్ కాంబినేష‌న్‌లో ఓ చిత్రం రూపుదిద్దుకోనున్న సంగ‌తి తెలిసిందే. ఈ చిత్రాన్ని హారిక హాసిని, ఎన్టీఆర్ ఆర్ట్స్ సంయుక్తంగా నిర్మిస్తున్నాయి. ఎన్టీఆర్ ఆర్ట్స్ అంటే.. ఎన్టీఆర్ సొంత నిర్మాణ సంస్థ‌లాంటిదే. ఈ బ్యాన‌ర్‌లో ఎన్టీఆర్ చేసిన `జై ల‌వ‌కుశ‌` మంచి లాభాల‌నే అందించింది. ఇక మీద‌ట ప్ర‌తీ సినిమాకీ ఎన్టీఆర్ ఆర్ట్స్‌ని భాగ‌స్వామిగా చేయాల‌ని తార‌క్ నిర్ణ‌యించుకున్న‌ట్టు తెలుస్తోంది. ఇప్పుడు ప్ర‌తీ అగ్ర హీరో ఓ సొంత నిర్మాణ సంస్థ‌ని మెయింటైన్ చేస్తున్నాడు. మ‌హేష్‌, చ‌ర‌ణ్‌, బన్నీ, ప్ర‌భాస్‌.. వీళ్లంద‌రి చేతుల్లో ప్రొడ‌క్ష‌న్ హౌస్‌లు ఉన్నాయి. పారితోషికం తీసుకోకుండా, నిర్మాణంలో భాగం పంచుకొని, లాభాల్లో వాటా అందుకుంటున్నారు. ఇది మ‌రింత లాభ‌దాయ‌కంగా క‌నిపించ‌డంతో… సొంత బ్యాన‌ర్‌ని భాగ‌స్వామిగా మారుస్తున్నారు. ఎన్టీఆర్‌కీ ఇదే ఆలోచ‌న వ‌చ్చింది. ఇక నుంచి ఎన్టీఆర్ పారితోషికాలు తీసుకోకుండా లాభాల్లో వాటా అందుకోవాల‌ని భావిస్తున్నాడ‌ట‌. అందుకే ఎన్టీఆర్ ఆర్ట్స్‌ని రంగంలోకి దించాడు. అలా చేయ‌డం ఉభ‌య తార‌కం కూడా. అన్న‌య్య బ్యాన‌ర్‌లో సినిమాలు చేస్తున్న‌ట్టు ఉంటుందీ, మ‌రోవైపు ప్ర‌స్తుతం ట్రెండ్‌ను అందిపుచ్చుకున్న‌ట్టూ ఉంటుంది. ఎటొచ్చే.. ఎన్టీఆర్ తో సినిమా చేయాల‌నుకున్న నిర్మాత‌లే.. పార్ట‌న‌ర్ షిప్‌కి ఫిక్స‌వ్వాల్సి ఉంటుంది.