దేశంలోనే అత్యుత్త‌మ డాన్స‌ర్ల జాబితా తీస్తే టాప్ 5 లో నిలుస్తారు హృతిక్ రోష‌న్‌, ఎన్టీఆర్‌. ఇద్ద‌రి డాన్సింగ్ స్టైల్ వేరు. ఇద్ద‌రి గ్రేస్ వేరు. కానీ ఇద్ద‌రిలో ఎవ‌రు స్టెప్పులేసినా చూపు తిప్పుకోలేం. అలాంటిదిది ఇద్ద‌రూ ఒకే పాట‌కు స్టెప్పులేస్తే ఎలా ఉంటుంది? ఆ ఊహే అద్భుతంగా ఉంది క‌దూ. ‘వార్ 2’లో ఇలాంటి ఓ అరుదైన పాట ఉంది. త్వ‌ర‌లోనే ఎన్టీఆర్‌, హృతిక్ రోష‌న్‌ల‌పై ఈ పాట‌ను తెర‌కెక్కించ‌బోతున్నార‌ని తెలుస్తోంది.

ఎన్టీఆర్‌, హృతిక్ రోష‌న్ హీరోలుగా అయాన్ ముఖ‌ర్జీ ద‌ర్శ‌క‌త్వంలో ‘వార్ 2’ రూపొందుతున్న సంగ‌తి తెలిసిందే. ఎన్టీఆర్ ఇప్ప‌టికే షూటింగ్ లో పాలు పంచుకొన్నారు. ఆయ‌న‌పై కొన్ని కీల‌క‌మైన యాక్ష‌న్ సీన్స్ తెర‌కెక్కించారు. ఈనెల‌లోనే ఎన్టీఆర్ మ‌రోసారి ‘వార్ 2’ సెట్లో అడుగు పెట్ట‌బోతున్నారు. ఈసారి ఎన్టీఆర్, హృతిక్ రోష‌న్ ల‌పై ఓ పాట రూపొందించ‌నున్నార‌ని తెలుస్తోంది. ఇందుకోసం ముంబైలో ఓ భారీ సెట్ కూడా తీర్చిదిద్దుతున్నార‌ని తెలుస్తోంది. ఎన్టీఆర్‌, హృతిక్‌ల‌తో పాటుగా క‌థానాయిక కిరాయా అద్వాణీ కూడా చిందులు వేయ‌బోతోంద‌ని స‌మాచారం. ప్ర‌ఖ్యాత నృత్య ద‌ర్శ‌కుల‌రాలు వైభ‌వీ మ‌ర్చంట్ ఈ పాట‌కు నృత్య రీతులు అందిస్తున్నార‌ని టాక్‌. ‘వార్ 2’ సినిమాలో ఈ పాట ప్ర‌త్యేక ఆక‌ర్ష‌ణ‌గా నిల‌వ‌బోతోంద‌ని, ఈ పాట కోసం దాదాపు రూ.8 కోట్లు ఖ‌ర్చు పెడుతున్నార‌ని ఇన్ సైడ్ వ‌ర్గాలు చెబుతున్నాయి. ‘ఆర్‌.ఆర్‌.ఆర్‌’లో ఎన్టీఆర్‌, చ‌ర‌ణ్‌లు క‌లిసి స్టెప్పేస్తే బాక్సాఫీసుకు పూన‌కాలు వ‌చ్చేశాయి. ఆ పాట‌కు ఆస్కార్ సైతం ద‌క్కింది. మ‌రి హృతిక్ తో ఎన్టీఆర్ చేసే ఈ పాట ఇంకెంత హంగామా చేస్తుందో చూడాలి.