అమ‌ర శిల్పి అనిపించుకోవ‌డానికి త‌హ‌త‌హ‌లాడుతూ… సినిమాని చెక్కుతూ పోయే ద‌ర్శ‌కుల్లో త్రివిక్ర‌మ్ ఒక‌డు. స్వ‌త‌హాగా ర‌చయిత కాబ‌ట్టి… రాసిన ప్ర‌తీ సీనూ తీయాల‌నుకుంటాడు. మ‌ళ్లీ రాసి… మ‌ళ్లీ తీస్తుంటాడు. దేనికీ రాజీ ప‌డ‌డ‌ని, సినిమాని చెక్కే విష‌యంలో అంద‌రికంటే ముందు ఉంటాడని ప్ర‌సిద్ది చెందాడు. అయితే.. ఇప్ప‌డు త్రివిక్ర‌మ్ త‌న శైలి మార్చిన‌ట్టు తెలుస్తోంది. ‘అజ్ఞాత‌వాసి’ ఎఫెక్టో ఏమో… ఎన్టీఆర్ సినిమాని శ‌ర‌వేగంగా పూర్తి చేస్తున్నాడ‌ని స‌మాచారం. ఈ సినిమాని ద‌స‌రాకి విడుద‌ల చేయాల‌న్న ధ్యేయంలో ఉన్నాడు త్రివిక్ర‌మ్‌. రిలీజ్ డేట్ కూడా ఆల్మోస్ట్ లాక్ అయిపోయిన‌ట్టే. అందుకే ప‌నుల్ని శ‌ర వేగంగా పూర్తి చేస్తున్నాడ‌ట‌. ప్ర‌స్తుతం హైద‌రాబాద్ శివార్ల‌లోని కొంపెల్లిలో షూటింగ్ జ‌రుగుతోంది. మ‌రో ప‌ది రోజుల పాటు షూటింగ్ అక్క‌డే. రోజుకి రెండు షిఫ్టుల‌పై షూటింగ్ చేస్తున్నార‌ని, బ్రేక్ ఇవ్వ‌డానికి అస్స‌లు ఇష్ట‌ప‌డ‌డం లేద‌ని స‌మాచారం. టైటిల్‌కి, ఫ‌స్ట్ లుక్‌కి వ‌స్తున్న స్పందన ప‌ట్ల చిత్ర‌బృందం సంతోషంగా ఉంది. టైటిల్ లో తెలుగుద‌నం, మాసిజం ఉట్టిప‌డుతుండ‌డంతో ఎన్టీఆర్ ఫ్యాన్స్‌కీ బాగా న‌చ్చేస్తోంది. అదే ఉత్సాహంతో సినిమాని లాగించేస్తున్నాడు త్రివిక్ర‌మ్‌. పూజా హెగ్డే క‌థానాయిక‌గా న‌టిస్తున్న ఈ చిత్రానికి త‌మ‌న్ సంగీతం అందిస్తున్నాడు. త్రివిక్ర‌మ్ సినిమాకి స్వ‌రాలు అందించ‌డం త‌మ‌న్‌కి ఇదే తొలిసారి.