గీత గోవిందంతో వంద కోట్ల సినిమా అందించాడు ప‌ర‌శురామ్‌. అయితే ఆ సినిమా అంత హిట్ట‌యినా, త‌దుప‌రి చిత్రాన్ని ప‌ట్టాలెక్కించ‌డంలో బాగా టైమ్ తీసేసుకున్నాడు. ఇప్పుడు నాగ‌చైత‌న్య‌తో ఓ సినిమా ఖాయం చేసుకున్నాడు. ఈ సినిమాకి ‘నాగేశ్వ‌ర‌రావు’ అనే పేరు ప‌రిశీల‌న‌లో ఉంది. టైటిల్ మారినా.. ప‌ర‌శురామ్ పంథాని మాత్రం మార్చ‌బోవ‌డం లేద‌ని తెలుస్తోంది. ఇప్పుడు ఈ క‌థ కూడా `గీత గోవిందం`ని పోలి ఉంటుంద‌ట‌.

గీత గోవిందం – ఓ అబ్బాయి, అమ్మాయి మ‌ధ్య సాగిన మిస్ అండ‌ర్‌స్టాండింగ్‌. అపార్థాల ముసుగు తొలిగి, ఇద్ద‌రూ ప్రేమ‌లో ప‌డడ‌మే క‌థ. ‘నాగేశ్వ‌ర‌రావు’ లైన్ కూడా ఇలానే ఉంటుంద‌ట‌. కాక‌పోతే ‘గీత గోవిందం’లో అబ్బాయిని అమ్మాయి అపార్థం చేసుకుంటుంది. ఈసారి అమ్మాయిని అబ్బాయి అపార్థం చేసుకుంటాడు. అంతే తేడా. ఇందులో చైతూ లుక్ కూడా కొత్త‌గా ఉంటుంద‌ని, మ‌ధ్య‌త‌ర‌గ‌తి యువ‌కుడిగా క‌నిపించ‌బోతున్నాడ‌ని తెలుస్తోంది. మ‌రి నాగేశ్వ‌ర‌రావు అన‌బ‌డే గీత గోవిందం 2.. ఎలా ఉంటుందో చూడాలంటే ఇంకొన్ని రోజులు ఆగాలి.