మహేష్ బాబు – మురుగ‌దాస్ కాంబినేష‌న్‌లో సినిమా ఇంకా ప‌ట్టాకెక్క‌క‌ముందే సెన్సేష‌న‌ల్ అయికూర్చుంది. ఈ సినిమా కోసం మహేష్, మురుగ‌దాస్ అందుకొంటున్న పారితోషికం చూసి సౌత్ ఇండియ‌న్ సినిమా మొత్తం ముక్కున వేలేసుకొంది. మ‌హేష్‌కి ఈ సినిమాకి గానూ… రూ.24 కోట్లు ద‌క్క‌బోతున్నాయ‌ట. ఒక్క మురుగ‌దాసే ఈ సినిమాకి రూ.18 కోట్ల పారితోషికం అందుకొంటున్నాడ‌ని టాక్‌. వీరిద్ద‌ర్నీ ప‌క్క‌న పెడితే క‌థానాయిక‌గా ఎంపికైన ప‌రిణితీ చోప్రాకి రూ.3.5 కోట్లు క‌ట్ట‌బెట్టార‌ట. అంటే ఈ ముగ్గురి పారితోషికాల‌కే 45 కోట్ల రూపాయ‌ల వ‌ర‌కూ ఖ‌ర్చ‌వుతోంద‌న్న‌మాట,.
మహేష్, మురుగ‌దాస్ అంటే ఆ మాత్రం పారితోషికం ఇవ్వ‌డంలో త‌ప్పులేదు. బాలీవుడ్‌లో క్రేజీ హీరోయిన్‌గా గుర్తింపు తెచ్చుకొంది కాబ‌ట్టి ప‌రిణితి కూడా అంత అందుకోవ‌డానికి అర్హురాలే.కాక‌పోతే.. మహేష్ సినిమాల్లో హీరోయిన్ పాత్ర వ‌ల్ల కొత్త‌గా ఒరిగే మైలేజీ ఏం ఉండ‌దు. సౌతిండియ‌న్ హీరోయిన్‌ని తీసుకొంటే స‌రిపోతుంది. ఎందుకంటే మురుగ‌దాస్ సినిమాని బాలీవుడ్‌లో విడుద‌ల చేసే ఛాన్స్ లేదు. ఎందుకంటే సౌత్‌లో హిట్ట‌యిన సినిమాని ఆటోమెటిగ్గా ఆయ‌న హిందీలో రీమేక్ చేస్తుంటారు. కాబ‌ట్టి మహేష్ సినిమాని బాలీవుడ్‌లో డ‌బ్ చేసే అవ‌కాశం లేదు. అలాంట‌ప్పుడు బాలీవుడ్ హీరోయిన్‌ని అంత పెట్టి తీసుకోవ‌డంలో అర్థం లేద‌ని సినీ విశ్లేష‌కులు అభిప్రాయ ప‌డుతున్నారు. అయితే చిత్ర‌బృందం వాద‌న ఇంకోలా ఉంది. మహేష్ – ప‌రిణితి అంటే ఈ కాంబినేషన్ వ‌ల్ల సినిమాకి కొత్త లుక్ వ‌స్తుందంటున్నారు. అదీ నిజ‌మే క‌దా.
