డిప్యూటీ సీఎంగా బాధ్యతలు చేపట్టిన పవన్ కల్యాణ్.. తన తరపున పనులు చక్క బెట్టేందుకు నమ్మకమైన, సమర్థమైన ఐఏఎస్ అధికారి కోసం చూస్తున్నారు. ఆయనకు ప్రస్తుతం కేరళలో పని చేస్తున్న కృష్ణతేజ అనే యువ ఐఏఎస్ అధికారి మంచి చాయిస్ గా కనిపిస్తున్నారు. కృష్ణతేజ పవన్ వీరాభిమాని. పవన్ స్ఫూర్తితోనే తాను ఐఎఎస్ సాధించానని చెబుతూంటారు.కేరళలో ఆయన సమర్థమైన అధికారిగా పేరు తెచ్చుకున్నారు. ప్రస్తుతం త్రిస్సూర్ కలెక్టర్ గా ఉన్నారు.
ఇటీవల ఆయనకు బాలల హక్కులు కాపాడినందుకు ప్రతిష్టాత్మక అవార్డు వచ్చింది. ఈ సందర్భంగా పవన్ కూడా ప్రత్యేకంగా అభినందించారు. అనూహ్యంగా కృష్ణతేజ పవన్ సచివాలయానికి వచ్చిన సందర్భంలో అక్కడ కనిపించారు. మంగళవారం పవన్ .. సచివాలయానికి వచ్చారు. చంద్రబాబుతో సమావేశం అయ్యారు. ఈ సందర్భంగా కృష్ణతేజ కూడా వచ్చారు. దీంతో పవన్ తన టీమ్ లో ఆయనను తీసుకోవాలని అనుకుంటున్నట్లుగా స్పష్టమయింది.
కృష్ణతేజను ఏపీకి డిప్యూటేషన్ మీద తీసుకు రావాల్సి ఉంటుంది. ఇందు కోసం కేరళ కూడా అంగీకరించాలి. అందుకే కృష్ణతేజ అంశాన్ని పవన్ కల్యాణ్ చంద్రబాబు దృష్టికి తీసుకెళ్లినట్లుగా తెలుస్తోంది. వెంటనే ప్రతిపాదన పెతామని చంద్రబాబు హామీ ఇచ్చినట్లుగా చెబుతున్నారు. త్వరలో కృష్ణతేజ పవన్ ఓఎస్డీగా విధుల్లోకి వచ్చే అవకాశం ఉంది. కృష్ణతేజ చిలుకలూరిపేటకు చెందిన వారు.
