ప‌వ‌న్ క‌ల్యాణ్ – ఎస్‌.జె సూర్య‌ల సినిమా ఎప్పుడు మొద‌ల‌వుతుంది?? అంటూ ప‌వ‌న్ అభిమానులు ఆస‌క్తిగా ఎదురుచూశారు. చిరంజీవి క‌త్తి సినిమాకి క్లాప్ కొట్టే 29న ప‌వ‌న్ సినిమా కూడా మొద‌ల‌వుతుంద‌ని అనుకొన్నారు. కానీ స‌డ‌న్‌గా ప‌వ‌న్‌.. రెండు రోజుల ముందే త‌న ప‌ని సైలెంట్‌గా కానిచ్చేశాడు. ఈ రోజు ఉద‌యం 10.30 గంట‌ల‌కు హైద‌రాబాద్ లోని శ‌ర‌త్ మ‌రార్ ఆఫీసులో ప‌వ‌న్ కొత్త సినిమా గ‌ప్ చుప్‌గా పూజా కార్య‌క్ర‌మాల‌తో మొద‌లైంది. ప‌వ‌న్‌, ఎస్‌.జె సూర్య‌, శ‌ర‌త్ మ‌రార్‌, నిర్మాత సుధాక‌ర్‌రెడ్డి,గౌతం రాజులు మాత్ర‌మే ఈ కార్య‌క్ర‌మానికి హాజ‌ర‌య్యారు. ప‌వ‌న్ సినిమాలెప్పుడూ సైలెంట్‌గానే మొద‌ల‌వుతాయి. కానీ మ‌రీ ఇంత గ‌ప్‌చుప్ గా ఎలా స్టార్ట్ చేశారు అన్న అనుమానాలు వ్య‌క్తం అవుతున్నాయి. ఈనెల 29నే ప‌వ‌న్ సినిమా మొద‌ల‌వుతుంద‌ని ఫీల‌ర్ వ‌దిలి.. ఈలోగా సైలెంట్‌గా మొద‌లెట్ట‌డం ప‌వ‌న్ ఫ్యాన్స్‌నీ ఆశ్చ‌ర్యానికి గురిచేసేదే. మే రెండో వారంలో ఈసినిమాని సెట్స్‌పైకి తీసుకెళ్లే అవ‌కాశాలున్నాయి. మ‌రి ఇందులో క‌థానాయిక ఎవ‌రు? మిగిలిన న‌టీన‌టుల మాటేంటి? అన్న‌ది త్వ‌ర‌లో తెలుస్తుంది.