హైదరాబాద్: సర్దార్ గబ్బర్‌సింగ్ చిత్రంలో స్పెషల్ సాంగ్ అవకాశం లభించినందుకు సంబరపడుతున్న లక్ష్మీరాయ్‌, ఆ ఆనందంలో చేసిన పొరపాటు ఆమెకు గ్రహపాటై కూర్చుంది. గబ్బర్‌సింగ్ చిత్రంలో షూటింగులో పాల్గొంటున్న దగ్గరనుంచి దానికి సంబంధించిన ఏదో ఒక ఫోటోను ట్విట్టర్‌లో పెడుతూ వస్తోంది. ఇటీవల పవన్ కళ్యాణ్‌తో సెట్‌‍లో దిగిన ఫోటోను పెట్టింది. దీనంతటితో పవన్ ఫ్యాన్స్ ఆమెను పెద్ద సంఖ్యలో ఫాలో అవటం మొదలుపెట్టారు. ఇదిలా ఉంటే గబ్బర్‌సింగ్ సెట్లో ఆమెకు ఒక చిన్న కుక్కపిల్ల దొరికింది. ముద్దుగా ఉండటంతో దానిని పట్టుకుని ఫోటోలు దిగి ట్విట్టర్‌లో పెట్టింది. దానికి పేరు సూచించమని కోరింది. మరి ఎవరైనా సూచించారో, తానే నిర్ణయించిందోగానీ ఆ కుక్కపిల్లకు సర్దార్ అని పేరు పెట్టింది. ఇది పవన్ ఫ్యాన్స్ ఆగ్రహానికి కారణమైంది. కుక్కపిల్లకు తమ హీరో పేరు పెట్టటమేమిటని మండిపడుతున్నారు. ట్విట్టర్‌లో ఆగ్రహావేశాలను వ్యక్తం చేస్తున్నారు.