వ‌ర్మ కళ్లెప్పుడూ ప‌వ‌న్ క‌ల్యాణ్‌పైనే ఉంటాయి. ప‌వ‌న్‌నీ, అత‌ని ఫ్యాన్స్‌నీ ఎలా గిచ్చాలా అని చూస్తుంటాడు. కాస్త సందు దొరికితే చాలు – వ‌ర్మ విజృంభించేస్తుంటాడు. కోరి మ‌రీ త‌గ‌వు పెట్టుకుంటాడు. అలాంటిది ప‌వ‌న్ ఫ్యాన్స్ కెలికితే ఊరుకుంటాడా..? ఈమ‌ధ్య `వ‌ర్మ చ‌నిపోయాడు.. `అంటూ ఊర్ల‌లో ఫ్లెక్సీలు పెట్టేశారు ప‌వ‌న్ క‌ల్యాణ్ ఫ్యాన్స్‌. వాటిని వ‌ర్మ త‌న ఫేస్‌బుక్‌లోనూ షేర్ చేసుకున్నాడు. దెయ్య‌మై మీ ప‌వ‌న్ క‌ల్యాణ్‌ని వెంటాడ‌తా అంటూ పోస్ట్ చేశాడు వ‌ర్మ‌.

ఇప్పుడు ప‌వ‌న్‌పై, అత‌ని ఫ్యాన్స్‌పై మ‌రింత క‌సి తీర్చుకునేందుకు రంగం సిద్ధం చేసుకున్నాడు. ప‌వ‌న్‌పై, జ‌నసేన పార్టీపై ఓ సెటైరిక‌ల్ సినిమా తీయాల‌ని నిర్ణ‌యించుకున్నాడ‌ట వ‌ర్మ‌. అస‌లు ప‌వ‌న్ క‌ల్యాణ్ రాజ‌కీయాల్లోకి ఎందుకొచ్చాడు? వ‌చ్చి ఏం సాధించాడు? ప‌వ‌న్ ఐడియాల‌జీ ఏమిటీ? అనే విష‌యాల్ని వ్యంగ్యంగా చ‌ర్చించ‌బోతున్నాడ‌ట‌. `మ‌ట్టికుండ‌లో మ‌జ్జిగ‌న్నం` అనే పేరు ఇటీవ‌ల బాగా చక్క‌ర్లు కొట్టింది. అస‌లు దానికీ వ‌ర్మ‌కీ ఎలాంటి సంబంధం లేదు. కాక‌పోతే.. వ‌ర్మ కూడా అలాంటి టైటిల్ ఒక‌టి త్వ‌ర‌లోనే ప్ర‌క‌టించే అవ‌కాశాలున్నాయ‌ని తెలుస్తోంది. సో.. ఈసారి జ‌న‌సైనికులు మ‌రింత ప్రిపేర్డ్‌గా ఉండ‌డం అవ‌స‌రం.