జ‌న‌సేనానివ ప‌వ‌న్ క‌ల్యాణ్ ఇప్పుడు సినిమాల‌పై మ‌ళ్లీ ఫోక‌స్ చేశారు. ఆయ‌న కొత్త సినిమాల‌కు సంబంధించిన అప్ డేట్లు ఒకొక్క‌టిగా బ‌య‌ట‌కు వ‌స్తున్నాయి. ‘ఓజీ’కు సంబంధించి శింబు ఓ పాట పాడితే, దాన్ని ఇటీవ‌లే రికార్డ్ చేశారు. ఇప్పుడు ‘హ‌రి హ‌ర వీర‌మ‌ల్లు’ రిలీజ్ డేట్ ప్ర‌క‌టించారు. మార్చి 28న ఈ చిత్రాన్ని విడుద‌ల చేస్తున్న‌ట్టు చిత్ర‌బృందం అధికారిక ప్ర‌క‌ట‌న విడుద‌ల చేసింది. అంటే 2025 వేస‌వి సీజ‌న్‌కు వీర‌మ‌ల్లు బోణీ కొట్ట‌బోతున్నాడ‌న్న‌మాట. అప్ప‌టికి ప‌రీక్ష‌లు పూర్త‌వుతాయి. వేస‌వి సీజ‌న్ మొద‌ల‌వుతుంది. కొత్త సినిమాల హ‌డావుడి అక్క‌డ్నుంచే షురూ అవుతుంది. కాబ‌ట్టి వీర‌మ‌ల్లుకు మంచి డేట్ దొరికిన‌ట్టే.
వీర‌మ‌ల్లుని రెండు భాగాలుగా రూపొందిస్తున్న సంగ‌తి తెలిసిందే. తొలి భాగంలో కొంతమేర క్రిష్ ఆధ్వ‌ర్యంలో న‌డిచింది. ఆ త‌ర‌వాత ఆయ‌న వేరే సినిమా ప‌నుల్లో ప‌డిపోయారు. ఆ త‌ర‌వాత ద‌ర్శ‌క‌త్వ బాధ్య‌త‌ని జ్యోతికృష్ణ స్వీక‌రించారు. ఏ.ఎం.ర‌త్నం ఈ చిత్రాన్ని అత్యంత ప్ర‌తిష్టాత్మ‌కంగా రూపొందిస్తున్నారు. కీర‌వాణి సంగీతాన్ని స‌మ‌కూరుస్తున్నారు. మొఘ‌లాయిల ప‌రిపాల‌నా నేప‌థ్యంలో సాగే క‌థ ఇది. వీర‌మ‌ల్లు ఓ దొంగ‌గా క‌నిపించ‌నున్నాడు. ఈ సినిమా కోసం చార్మినార్‌, గోల్కండ సెట్స్ వేశారు. ప్ర‌స్తుతం విజ‌య‌వాడ ప‌రిస‌ర ప్రాంతాల్లో యుద్ధ స‌న్నివేశాల్ని తెర‌కెక్కిస్తున్నారు. త్వ‌ర‌లోనే ప‌వ‌న్ కూడా ‘వీర‌మ‌ల్లు’ సెట్లో అడుగు పెట్ట‌బోతున్నాడు.
