చేతిలో ఉన్న సినిమాల‌న్నీ ఎప్పుడు పూర్త‌వుతాయో తెలీదు గానీ, ప‌వ‌న్ క‌ల్యాణ్ మాత్రం… వ‌రుస‌గా `మాట‌` ఇచ్చుకుంటూ వెళ్తున్నాడు. అలా.. ప‌వ‌న్ నుంచి ఇప్పుడు మ‌రో ద‌ర్శ‌కుడికి భ‌రోసా ల‌భించింది. మ‌రో కాంబినేష‌న్ దాదాపు సెట్ అయ్యింది. కాక‌పోతే.. అదెప్పుడో, ఎవ్వ‌రికీ అర్థం కాని ఫ‌జిల్‌. ప‌వ‌న్ భ‌రోసా అందుకున్న‌వాళ్లెవ‌రో కాదు.. జానీ మాస్ట‌ర్‌.

ప‌వ‌న్ చేతిలో వ‌కీల్ సాబ్ ఉందిప్పుడు. సంక్రాంతికి రావాల్సిన సినిమా ఇది. కానీ.. అది సాధ్య‌మ‌య్యేలా లేదు. ఈ సినిమాని ప‌వ‌న్ ఎప్పుడు పూర్తి చేస్తాడో క్లారిటీ లేదు. ఆ త‌ర‌వాత క్రిష్‌, హ‌రీష్ శంక‌ర్‌లు లైన్లో ఉన్నారు. మ‌ధ్య‌లో… `అప్ప‌ప్ప‌యుమ్ కోషియ‌మ్‌` రీమేక్ ఉంది. ఇవ‌న్నీ ఉండ‌గానే… జానీ మాస్ట‌ర్ కి సైతం.. ప‌వ‌న్ గ్రీన్ సిగ్న‌ల్ ఇచ్చిన‌ట్టు గుస‌గుస‌లు వినిపిస్తున్నాయి. కొరియోగ్రాఫ‌ర్ గా జానీ మాస్ట‌ర్ ఫుల్ ఫామ్ లో ఉన్నారు. ఈమ‌ధ్య టాలీవుడ్‌ని ఓ ఊపు ఊపేసిన పాట‌ల‌న్నింటికీ ఆయ‌నే కొరియో గ్రాఫ‌ర్‌. త‌న‌కెప్ప‌టి నుంచీ మెగాఫోన్ ప‌ట్టాల‌ని వుంది. త‌న‌కిష్ట‌మైన ప‌వ‌న్ క‌ల్యాణ్‌తో ఓ సినిమా చేయాల‌ని ఆశ ప‌డుతున్నాడు. రెండేళ్ల క్రిత‌మే ఈ ప్ర‌య‌త్నం మొద‌లైంది. ప‌వ‌న్‌ని త‌ర‌చూక‌లుస్తూనే ఉన్నాడు. ఈమ‌ధ్య వ‌కీల్ సాబ్ సెట్లో కూడా జానీ మాస్ట‌ర్ ప‌వ‌న్ ని క‌లిశాడ‌ని, లైన్ చెప్పేశాడ‌ని టాక్‌. ప‌వ‌న్ కూడా జానీతో సినిమా చేయ‌డానికి సానుకూలంగానే ఉన్నాడ‌ట‌. ప‌వ‌న్ ఎప్పుడంటే అప్పుడు జానీ మాస్ట‌ర్ మెగా ఫోన్ ప‌ట్టుకోవ‌డానికి సిద్ధం. పవ‌న్‌తో సినిమా ఎంత ఆల‌స్య‌మైనా స‌రే, ఆయ‌న సినిమాతోనే డైరెక్ట‌ర్‌గా అడుగుపెడ‌తాన‌ని, ఈలోగా కొరియోగ్ర‌ఫీ చేసుకుంటానని అంటున్నాడు జానీ మాస్ట‌ర్‌. సో.. ప‌వ‌న్ లిస్టులో మ‌రో ద‌ర్శ‌కుడు చేరిపోయిన‌ట్టే.