జనసేన అధినేత పవన్ కల్యాణ్.. రాజధాని రైతులకు మద్దతుగా నిలిచారు. వారి సమస్యలపై పోరాడాలని నిర్ణయించుకున్నారు. ఆంధ్రప్రదేశ్ ప్రభుత్వం రాజధానిని మారుస్తుందనే ప్రచారం జరుగుతూండటంతో… రాజధాని రైతులంతా.. ఓ సంఘంగా ఏర్పడి… రాజకీయ పార్టీల మద్దతు కోసం ప్రయత్నిస్తున్నారు. ముందుగా భారతీయ జనతా పార్టీ అధినేత కన్నా లక్ష్మినారాయణను గుంటూరులో కలిశారు. మద్దతు కోరారు. ఆయన అమరావతిని అక్కడే నిర్మించాలని డిమాండ్ చేశారు. రైతులకు న్యాయం చేయాలని… చెల్లించాల్సిన కౌలును వెంటనే చెల్లించాలని.. ప్రభుత్వానికి లేఖ కూడా రాశారు. ఈ క్రమంలో.. జనసేన అధినేత మద్దతు కోసం… రైతులు హైదరాబాద్‌ వెళ్లారు. పవన్ కల్యాణ్ ను కలిశారు. ఏపీ ప్రభుత్వ వైఖరిని .. పవన్ కు తెలియచేసి మద్దతు కోరారు.

రాజధాని రైతుల సమస్యలను… పవన్ కల్యాణ్ సావధానంగా విన్నారు. వారికి మద్దతుగా నిలబడాలని నిర్ణయించుకున్నారు. రాజధాని రైతుల ఆవేదనను అర్థం చేసుకున్నా…వారికి అండగా ఉంటానని ప్రకటించారు. రాజధానిని అమరావతి నుంచి తరలించొద్దని ప్రభుత్వానికి సూచించారు. గత ప్రభుత్వ నిర్ణయాన్ని మరింత మెరుగ్గా ఈ ప్రభుత్వం ముందుకు తీసుకెళ్లాలని.. రాజధాని సమస్య ఒక ప్రాంతానిది కాదు…రాష్ట్రమంతటిదన్నారు. వారితో సమావేశం ముగిసిన వెంటనే.. రాజధానిలో తన పర్యటన షెడ్యూల్‌ను ఖరారు చేసుకున్నారు. ఈ నెల ఈ నెల 30, 31 తేదీల్లో రెండు రోజుల పాటు పవన్ కల్యాణ్.. రాజధాని ప్రాంతంలోని అన్ని గ్రామాల్లోనూ విస్తృతంగా పర్యటించనున్నారు. ప్రతీ గ్రామంలోనూ.. భూములిచ్చిన రైతులతో మాట్లాడతారు. అలాగే.. అమరావతిలో నిలిచిపోయిన పనులను కూడా పరిశీలిస్తారు. ఆ తర్వాత… ఏపీ సర్కార్ … అనుసరిస్తున్న తీరుపై.. తన పోరాట కార్యాచరణ ప్రణాళికను ప్రకటించే అవకాశం ఉంది.

గతంలో జనసేన అధినేత పవన్ కల్యాణ్… రాజధానికి భూములు ఇవ్వడానికి ఇష్టపడని వారికి మద్దతుగా.. పోరాటం చేశారు. పలుమార్లు.. రాజధానిలో.. పర్యటించారు. ల్యాండ్ పూలింగ్ లో భూములు ఇవ్వని వారు చేసిన ఆందోళనలో పాలు పంచుకున్నారు. రాజధానికి అంత భూమి ఎందుకని.. విమర్శలు కూడా చేశారు. అప్పట్లో రాజధాని రైతులు.. పవన్ కల్యాణ్ పై విమర్శలు చేశారు. 95 శాతం మందికిపైగా రైతులు స్వచ్చందంగా భూములు ఇస్తే.. ఐదు శాతం కోసమే.. పవన్ మాట్లాడుతున్నారని… తమ ప్రయోజనాల గురించి ఎందుకు మాట్లాడరని విమర్శలు గుప్పించారు. ఇప్పుడు.. పవన్ ఆ రైతుల పోరాటానికి మద్దతుగా నిలిచారు. వారి కోసం.. రాజధానిలో పర్యటించబోతున్నారు.