డిస్కోరాజాలో ఇద్ద‌రు హీరోయిన్లున్నారు. అందులో పాయ‌ల్ రాజ్‌పుత్ కూడా ఉంది. ఆర్‌.ఎక్స్ 100తో వ‌చ్చిన క్రేజ్ దృష్ట్యా పాయ‌ల్‌ని ఎంచుకున్నారు. అలాగ‌ని ఇందులో త‌న‌ది గ్రామ‌ర్ పాత్రేం కాదు. క‌థ‌లో త‌న పాత్ర చాలా కీల‌కం. ఈ సినిమాలో క‌ళ్లు లేని అమ్మాయిగా న‌టించ‌బోతోంది పాయ‌ల్‌. త‌న‌కి వినిపించ‌దు కూడా. ఆ ర‌కంగా చూస్తే పాయ‌ల్ ప్ర‌యోగ‌మే చేస్తోంది.

కానీ… అంత‌కంటే ముందు పాయ‌ల్ నటిస్తున్న ఆర్‌డిఎక్స్ ల‌వ్ అనే సినిమా విడుద‌ల అవుతోంది. ఈ సినిమా టీజ‌ర్ చూసి నోరెళ్ల‌బెట్టారు. ప‌క్కా బీ గ్రేడ్ సినిమాలా ఉంది అని తేల్చేస్తున్నారు. ఈ సినిమా రాత‌, తీత‌, అందులో పాయ‌ల్ అవ‌తారం అలానే ఉన్నాయి మ‌రి. ఈ సినిమా త‌ర‌వాత‌.. డిస్కోరాజా విడుద‌ల అవుతుంది. అందులో పాయ‌ల్‌ని ప‌ర‌మ ప‌ద్ధ‌తిగా చూపిస్తే జ‌నాలు క‌నెక్ట్ అవుతారా? లేదా అనే డౌటు పుట్టుకొస్తోంది ద‌ర్శ‌క నిర్మాత‌ల‌కు. ఆర్‌.ఎక్స్ 100 త‌ర‌వాత పాయ‌ల్ కి చాలా అవ‌కాశాలొచ్చాయి. నాగ‌శౌర్య సినిమాలో క‌థానాయిక‌గా తీసుకుందామ‌నుకున్నారు. కానీ ఎప్పుడైతే ఆర్‌డిఎక్స్ అనే సినిమాపై పాయ‌ల్ సంత‌కం చేసిందో, ఆ క్ష‌ణ‌మే నాగ‌శౌర్య టీమ్ పాయ‌ల్ ని తీసుకోవాల‌న్న ఆలోచ‌న విర‌మించుకుంది. కానీ ర‌వితేజ మాత్రం దొరికిపోయాడు. మ‌రి డిస్కో రాజాకు పాయ‌ల్ ప్ల‌స్ అవుతుందా? మైన‌స్ అవుతుందా? అనేది తేలాలంటే మాత్రం ఇంకొన్ని రోజులు ఆగాలి.