పోతిరెడ్డిపాడు ప్రాజెక్ట్ రాజకీయ అంశం అవుతోంది. ఆంధ్ర ప్రదేశ్ ప్రభుత్వం పోతిరెడ్డిపాడు సామర్థ్యం పెంచేందుకు ఉత్తర్వులు జారీ చేస్తే , అధికార టిఆర్ఎస్ పార్టీ ఎందుకు స్పందించడం లేదని తెలంగాణ కాంగ్రెస్ పార్టీ నేతలు విమర్శలు చేస్తున్నారు. ఓ రకంగా.. జీవో జారీ చేసిన తర్వాత వారం పాటు.. తెలంగాణ ప్రభుత్వం పట్టించుకోలేదు. కానీ కాంగ్రెస్ పార్టీ నేతలు విమర్శలు ప్రారంభించిన తర్వాతే… విషయాన్ని టేకప్ చేశారు. కానీ ఇప్పుడు ఆ వివాదం.. కాంగ్రెస్‌లోనే కాక రేపుతోంది. దీనికి కారణం.. కాంగ్రెస్ హయాంలోనే.. పోతిరెడ్డి పాడు నిర్మాణం జరిగింది మరి.

ముఖ్యమంత్రి కేసీఆర్ నిర్లక్ష్యనికి కృష్ణానదిపై ఉన్న ప్రాజెక్టులు ఎండిపోయే ప్రమాదం ఉందని నేతలు హెచ్చరిస్తున్నారు. పాలమూరు రంగారెడ్డి ప్రాజెక్టు, కల్వకుర్తి, ఎస్ఎల్బీసీ ప్రాజెక్టులకు నీరు అందని పరిస్థితి ఉంటుందని.. మహబూబ్ నగర్, నల్లగొండ, ఖమ్మం, ఉమ్మడి జిల్లాలు ఎడారిగా మారు తాయని ప్రెస్‌మీట్లు పెట్టి చెబుతున్నారు. గ్రేటర్ హైదరాబాద్ కు కూడా మంచి నీటి సమస్య వస్తుందని ఉంటున్నారు ఇలా చేస్తున్న విమర్శల్లో.. పోతిరెడ్డిపాడు పుట్టుక గురించిన చర్చ కూడా… టీ కాంగ్రెస్ నేతల విమర్శల్లో వస్తోంది. ఉత్తమ్ కుమార్ రెడ్డి.., అసలు మొదటి నుంచి పోతిరెడ్డి పాడు విషయంలో తెలంగాణకు అన్యాయం జరుగుతోందని ప్రకటించారు. దీనిపై పొన్నాల లక్ష్మయ్య అభ్యంతరం చెప్పినట్లుగా తెలుస్తోంది.

వైఎస్ సీఎంగా ఉన్నప్పుడు.. పొన్నాల భారీ నీటి పారుదల శాఖ మంత్రిగా ఉన్నారు. అప్పుడే పోతిరెడ్డిపాడును నిర్మించారు. ఆనాడు పోతిరెడ్డిపాడుకు కేబినెట్ ఆమోదించిందని కాంగ్రెస్ పార్టీ మద్దతు ఇచ్చిందని పొన్నాల గుర్తు చేశారు. వరదజలాలను వినియోగించుకోవడానికి రెండు రాష్ట్రాల్లో ప్రాజెక్టుల నిర్మాణం చేపట్టామని చెప్పుకొచ్చారు. అప్పట్లో కేసీఆర్ అందుకే.. పోతిరెడ్డిపాడు అంశాన్ని తెలంగాణ సెంటిమెంట్ ను పెంచడానికి బాగా ఉపయోగించుకున్నారు. ఈ విషయం రాజకీయ దుమారంగా మారితే మొదట.. ఇబ్బంది పడేది కాంగ్రెస్ పార్టీనే అనే అభిప్రాయం వ్యక్తమవుతోంది.