సంక్రాంతికి ఇద్దరు స్టార్ హీరోల సినిమాల రిలీజవుతున్నాయి. అగ్రహీరోలయిన చిరంజీవి, బాలకృష్ణ సినిమాలు వస్తున్నాయి. వీటి ప్రి రిలీజ్ ఫంక్షన్ ఏపీలోనే నిర్వహించాలనుకున్నారు. బాలకృష్ణ సినిమా ఒంగోలులో.. చిరంజీవి సినిమాకు విశాఖలో నిర్వహించాలనుకున్నారు. మామూలుగా ఇలాంటి వేడుకలు ఎక్కడ జరిగినా అధికారులు ఎవర్నీ ఇబ్బంది పెట్టరు. ఎక్కడ నిర్వహించాలనుకుంటే అక్కడ పర్మిషన్ ఇస్తారు. భద్రత పరంగా సహకరిస్తారు. ఇంత కాలం జరిగింది ఇదే. కానీ విచిత్రంగా ఇప్పుడు.. రెండు సినిమాలకూ అధికారులు చుక్కలు చూపించారు. వేదికల్ని మార్చి మార్చి… అదనపు ఖర్చుకు కారణం అయ్యారు. అనుమతుల్లో గందరోళం సృష్టించారు. లేనిపోని ఆంక్షలు పెట్టారు. ఇందు కోసం ఆయా సినిమా బృందాల్ని తమ వెంట అదే పనిగా తిప్పుకున్నారు.
మైత్రి మూవీ మేకర్స్ నిర్మాత జగన్ వద్ద నిలబడిన ఓ ఫోటోను వైసీపీ సోషల్ మీడియా విస్తృతంగా ప్రచారం చేసుకుంది. అన్న సంతకం కోసం నెల రోజుల పాటు తిరిగితే కానీ.. సినిమా రిలీజ్ చేసుకోలేరని.. అదీ అసలు హీరోయిజం అని ఎలివేట్ చేసుకోవడం ప్రారంభించారు. దీన్ని బట్టి చూస్తే.. కేవలం సినిమాలు తమ కంటే తక్కువ .. తమ అధికారం కంటే వారి ప్రజాదరణ తక్కువ అని నిరూపించడానికి.. ఆ హీరోల్ని కించపర్చడానికి ఈ ఎపిసోడ్ ను నడిపించినట్లుగా ఎక్కువ మంది అనుమానిస్తున్నారు. జగన్ తో పాటు వైసీపీ నేతలు తమ ఇగోను శాటిస్ ఫై చేసుకోవడానికి వీరయ్య, వీరసింహారెడ్డిలను ఇబ్బంది పెట్టారని క్లారిటీ వస్తోంది.
అయితే హీరోలను తన తగ్గరకు రప్పించుకునేంత అధికారం.. సంతకాల కోసం తమ చుట్టూ తిప్పుకునేంత అధికారం ఇచ్చింది ప్రజలు. అయితే వారు ఇచ్చిన అధికారం ఈగో శాటిస్ ఫై చేసుకోవడానికి కాదు. ప్రజలకు మేలు చేయడానికి . అధికార దర్పం చూపించుకోవడానికి కాదు. అధికారం పోతే.. జగన్ ను అయినా..మరొకర్ని అయినా దేకడు. వ్యక్తిగతంగా జగన్ అనుమతి కోసం ఎవరూ రారు. ప్రభుత్వం దగ్గరకే వస్తారు. ఈ ప్రభుత్వానికి అధిపతిగా ఇవాళ జగన్ ఉంటారు.. రేపు ఉండరు. అదీ తేడా. గుర్తిస్తే సరే లేదంటే.. తర్వాత ప్రదర్శించుకోవడానికి అధికారం ఉండదు.
