రెండే రెండు సినిమాల‌తో తానేంటో నిరూపించుకొన్నాడు సందీప్ రెడ్డి వంగా. ఇప్పుడు అంద‌రి క‌ళ్లూ ‘స్పిరిట్‌’పైనే ఉన్నాయి. ప్ర‌భాస్ తో సందీప్ చేస్తున్న సినిమా ఇది. పైగా రెండు క‌ల్ట్ బ్లాక్ బ‌స్ట‌ర్ల త‌ర‌వాత సందీప్ నుంచి వ‌స్తున్న సినిమా. అందుకే అంచ‌నాలు తారాస్థాయికి చేరుకొన్నాయి. దానికి త‌గ్గ‌ట్టుగానే స్క్రిప్టుని డిజైన్ చేస్తున్నాడు సందీప్‌రెడ్డి వంగా. ఈ సినిమాలో ప్ర‌భాస్‌ని పోలీస్ ఆఫీస‌ర్‌గా చూపించ‌బోతున్నాడు సందీప్‌. ఈ విష‌యాన్ని ఇది వ‌ర‌కే ప్ర‌క‌టించాడు.

అయితే ‘స్పిరిట్‌’లో చాలా స‌ర్‌ప్రైజ్‌లు ఉండ‌బోతున్నాయ‌ని టాక్‌. ఇందులో ప్రభాస్ ద్విపాత్రాభిన‌యం చేయ‌బోతున్నాడ‌న్న వార్త‌లు వినిపిస్తున్నాయి. ‘బాహుబ‌లి’లో కూడా ప్ర‌భాస్ డ్యూయ‌ల్ రోల్ చేశాడు. కానీ రెండు పాత్ర‌లూ తెర‌పై ఒకేసారి క‌నిపించ‌లేదు. ‘స్పిరిట్లో’ రెండు పాత్ర‌ల్నీ ఒకేసారి తెర‌పై చూసే అవ‌కాశం ఉంద‌ని తెలుస్తోంది. అంతేకాదు.. విజ‌య్ దేవ‌ర‌కొండ‌, ర‌ణ‌బీర్ క‌పూర్‌లు కూడా ఈ సినిమాలో గెస్ట్ రోల్స్ లో క‌నిపించ‌బోతున్నార‌ని వార్త‌లు వ‌స్తున్నాయి. ప్ర‌తినాయ‌కుడి పాత్ర కోసం సందీప్ రెడ్డి వంగా అన్వేష‌ణ మొద‌లుపెట్టాడు. అందుకోసం ఓ స్టార్ హీరోని ఎంచుకొనే అవ‌కాశాలు పుష్క‌లంగా క‌నిపిస్తున్నాయి. ఈ సెట‌ప్ చూస్తుంటే, ‘స్పిరిట్లో’ క‌నీసం న‌లుగురైదుగురు బ‌డా స్టార్లు మెరిసే ఛాన్సులు ఉన్నాయి. ప్ర‌భాస్ సోలోగా వ‌స్తేనే బాక్సాఫీసు ద‌గ్గ‌ర పూన‌కాలు వ‌చ్చేస్తాయి. ఒకే సినిమాలో ఇంత‌మంది స్టార్లు క‌నిపిస్తే ఇంకేమైనా ఉందా? రికార్డులు బ‌ద్ద‌లైపోవ‌డం ఖాయం. ఈ యేడాదే ‘స్పిరిట్’ ప‌ట్టాలెక్కే అవ‌కాశాలు ఉన్నాయి. మ‌రోవైపు ప్ర‌భాస్ ‘రాజాసాబ్’ షూటింగ్ త్వ‌రిత‌గ‌తిన పూర్తి చేసేందుకు ప్ర‌య‌త్నిస్తున్నాడు. ‘ఫౌజీ’కీ కొన్ని డేట్లు కేటాయించాడు.