బాహుబ‌లిలో రెండు పాత్ర‌ల్లో ద‌ర్శ‌న‌మిచ్చాడు ప్ర‌భాస్. అమ‌రేంద్ర బాహుబ‌లి, మ‌హేంద్ర బాహుబ‌లిగా క‌నిపించాడు. బాహుబ‌లి 2లోనూ అవే పాత్ర‌లు మ‌ళ్లీ రిపీట్ అవ్వ‌బోతున్నాయి. అంతేకాదు… వీటికి తోడుగా ధ‌ర్మేంద్ర బాహుబ‌లి అనే మూడో పాత్ర కూడా క‌నిపించ‌బోతోంద‌ట‌. ఆ పాత్ర లోకూడా ప్ర‌భాసే క‌నిపించ‌నున్నాడ‌ని ఓ టాక్ ప్ర‌స్తుతం టాలీవుడ్‌లో హ‌ల్ చ‌ల్ చేస్తోంది. ధ‌ర్మేంద్ర బాహుబ‌లి అంటే ఎవ‌రో కాదు. అమ‌రేంద్ర బాహుబ‌లి నాన్న‌. అంటే.. మ‌హేంద్ర బాహుబ‌లికి తాత‌య్య అన్న‌మాట‌. బాహుబ‌లి ది క‌న్‌క్లూజ‌న్‌లో కొన్ని కొత్త పాత్ర‌లు క‌నిపించ‌బోతున్నాయ‌న్న టాక్ ముందు నుంచీ వినిపిస్తోంది. అందులో కీల‌క‌మైన పాత్ర ధ‌ర్మేంద్ర బాహుబ‌లిదే అని స‌మాచారం.

అయితే సిక్స్ ప్యాక్‌లో హీమాన్‌లా ఉండే ప్ర‌భాస్‌ని… తాత‌య్య‌గా చూడ‌గ‌ల‌మా? అనే సందేహాలొద్దు. ఎందుకంటే.. ధ‌ర్మేంద్ర బాహుబ‌లికి సంబంధించిన కొన్ని ఫ్లాష్ బ్యాక్ ఎపిసోడ్లు తెర‌పై క‌నిపిస్తాయ‌ని, వాటిలో ధ‌ర్మేంద్ర బాహుబ‌లి యంగ్‌లుక్‌లోనే ద‌ర్శ‌న‌మిస్తాడ‌ట‌. ఒక‌వేళ ఇదే నిజ‌మైతే ‘బాహుబ‌లి ది క‌న్‌క్లూజ‌న్‌’కు ఈ పాత్రే గొప్ప మ‌లుపు ఇవ్వ‌బోతోంద‌ని నిస్సందేహంగా చెప్పొచ్చు. అయితే ‘బాహుబ‌లి’ ప్రాజెక్టు మొద‌లైన‌ప్ప‌టి నుంచీ, ఇప్ప‌టి వ‌ర‌కూ ఈ సినిమాపై ర‌క‌ర‌కాల ఊహాగానాలు తెర‌పైకొచ్చాయి. అవ‌న్నీ దాదాపు క‌ల్పిత‌మైన విష‌యాలే. అయితే కొన్ని మాత్రం నిజ‌మ‌య్యాయి. మ‌రి ధ‌ర్మేంద్ర బాహుబ‌లి సంగ‌తేంటో తెలియాలంటే రాజ‌మౌళి నోరు విప్పాలి. లేదంటే… ‘బాహుబ‌లి 2’ వచ్చే వ‌ర‌కూ ఎదురు చూడాలి.