ప్ర‌భాస్ ప్ర‌స్తుతం రాధాకృష్ణ‌తో ఓ సినిమా చేస్తున్నాడు. ‘జాన్‌’, ‘రాధే శ్యామ్‌’ పేర్లు ప‌రిశీల‌న‌లో ఉన్నాయి. న‌వంబ‌రు నుంచి వైజ‌యంతీ మూవీస్‌కి డేట్లు ఇచ్చాడు. ఈ చిత్రానికి నాగ అశ్విన్ నిర్మాత‌. పాన్ ఇండియా స్థాయిలో ఈ చిత్రాన్ని తెర‌కెక్కిస్తున్నారు. దాదాపు రూ.250 కోట్ల బ‌డ్జెట్‌తో ఈ చిత్రం రూపుదిద్దుకుంటోంది. ఈ సినిమా క‌థే చాలా విచిత్రంగా ఉంటుంద‌ని, స‌రికొత్త జోన‌ర్‌లో ఈ చిత్రం త‌యార‌వుతోంద‌ని ద‌ర్శ‌క నిర్మాత‌లు చెబుతున్నారు.

అయితే ఇప్పుడు ఈ సినిమాకి సంబంధించి ఓ ఆస‌క్తిక‌ర‌మైన అంశం బ‌య‌ట‌కు వ‌చ్చింది. ఈ సినిమా క‌థంతా దేవుడు Vs సైన్స్ చుట్టూనే తిరుగుతుంద‌ట‌. దేవుడు ఉన్నాడా లేడా? అనే చ‌ర్చ వ‌చ్చిన ప్ర‌తీసారీ.. సైన్స్ గురించి మాట్లాడుకుంటూనే ఉంటాం. అలాంటి టాపిక్ ఈ సినిమాలోనూ ఉంటుంద‌ని, దానిపై చర్చ జ‌రుగుతుంద‌ని తెలుస్తోంది. నిజానికి ఇదో సైన్స్ ఫిక్ష‌న్ మూవీ. అందులో చాలా ఇంటిలిజెంట్‌గా దేవుడు అనే టాపిక్‌ని మిళితం చేశాడ‌ట నాగ అశ్విన్‌. ఆ మేళ‌వింపు.. త‌ప్ప‌కుండా కొత్త‌గా ఉంటుంద‌ని తెలుస్తోంది. ఈ చిత్రంలో క‌థానాయిక‌గా కొంత‌మంది బాలీవుడ్ భామ‌ల పేర్లు బ‌య‌ట‌కు వ‌స్తున్నాయి. మ‌రోవైపు దీపికా ప‌దుకొణెని ఫిక్స్ చేసిన‌ట్టు గుస‌గుస‌లూ వినిపిస్తున్నాయి. కానీ.. చిత్ర‌బృందం మాత్రం ఈ విష‌యంలో స్పందించ‌డం లేదు.