బాహుబ‌లి తెలుగు సినిమా కాదు, హాలీవుడ్ స్థాయి సినిమా అంటున్నారు సినీ అభిమానులు. ఇప్పుడు ప్ర‌భాస్ నుంచి ఆ స్థాయి చిత్రం మ‌రోటి రాబోతోంది. అదే సాహో. సుజిత్ ద‌ర్శ‌క‌త్వం వ‌హిస్తున్న ఈ చిత్రం ఇటీవ‌లే మొద‌లైంది. అంత‌లోనే టైటిల్ సాహోగా ఫిక్స‌య్యింది. ఇప్పుడు టీజ‌ర్ సిద్దం చేసేశారు. బాహుబ‌లి 2తో పాటు సాహో టీజ‌ర్‌ని చూపించాల‌న్న‌ది యువీ క్రియేష‌న్స్ ఆలోచ‌న‌. అందుకే సినిమా మొద‌లై నెల రోజులు కూడా అవ్వ‌క‌ముందే టీజ‌ర్ రెడీ అయ్యింది. అయితే అనుకోకుండా ముందే లీకైపోయింది. ఇప్పుడు పూర్తి క్వాలిటీతో, అఫీషియ‌ల్‌గా చిత్ర‌బృందం సాహో టీజ‌ర్‌ని విడుద‌ల చేసింది.

ఒక్క మాట‌లో చెప్పాలంటే టీజ‌ర్ అదిరిపోయింది. డైలాగ్ మాసీగా ఉన్నా, దాన్ని తీసిన విధానం య‌మ క్లాసీగా ఉంది. విజువ‌ల్ ఎఫెక్ట్స్ చూస్తుంటే స్పైడ‌ర్ మాన్ బ్యాట్‌మెన్ టైపు సినిమా ఏమో అనిపించ‌క‌మాన‌దు. సాహో టైటిల్‌, ప్ర‌భాస్ డైలాగ్, దాన్ని క‌ట్ చేసిన విధానం చూస్తుంటే క‌చ్చితంగా సాహోపై భారీ అంచ‌నాలు పెరిగిపోవ‌డం ఖాయం. ప్ర‌భాస్ ఫ్యాన్స్‌కి శుక్ర‌వారం పండ‌గ అనుకొన్నారు. కానీ పండ‌గ సాహో టీజ‌ర్‌తో ఓ రోజు ముందుగానే మొదలైపోయింది. ప్ర‌భాస్ ఫ్యాన్స్‌.. ఇట్స్ యువ‌ర్ టైమ్‌!!