యాంగ్రీ యంగ్‌మేన్‌… ఇదీ రాజశేఖర్ బిరుదు. ఈ రోజుతో దీనికి టాటా చెప్పేయండి. దర్శకుడు ప్రశాంత్ వర్మ ఆయనకు కొత్త బిరుదు ఇచ్చాడు. రాజ‌శేఖ‌ర్‌ను ‘యాంగ్రీ స్టార్’గా ప్రశాంత్ వర్మ ప్రేక్షకులకు పరిచయం చేస్తున్నాడు. సోమవారం రాజశేఖర్ పుట్టినరోజు సందర్భంగా ఆయనకు కొత్త ట్యాగ్ ఇచ్చాడు. అలాగే, టీజర్ విడుదల చేశారు. దీనిపై హీరో సంతోషం వ్యక్తం చేశాడు. “ఈమధ్య ‘యాంగ్రీ యంగ్‌మేన్‌’ అని పిలవడం నచ్చడం లేదు. వయసు అయిపోతే ‘యాంగ్రీ ఓల్డ్‌మేన్‌’ అంటారా? అనిపించేది. ఇప్పుడు హ్యాపీ. యంగ్ అయినా.. ఓల్డ్ అయినా.. ‘యాంగ్రీ స్టార్’ అనొచ్చు. నో ప్రాబ్లమ్” అని రాజశేఖర్ నవ్వేశారు.
రాజశేఖర్ కథానాయకుడిగా ప్రశాంత్ వర్మ దర్శకత్వంలో రూపొందుతున్న సినిమా ‘కల్కి’. తన తొలి చిత్రం కొందరికి అర్థం కాలేదనీ, ఈ ‘కల్కి’ అలా కాదనీ, అందరికీ అర్థమవుతుందనీ, ఇది పక్కా కమర్షియల్ చిత్రమనీ దర్శకుడు ప్రశాంత్ వర్మ తెలిపాడు. ‘అ!’ తరవాత అతడు దర్శకత్వం వహిస్తున్న చిత్రం ‘కల్కి’. ఇంతకు ముందు వచ్చిన కమర్షియల్ సినిమాల ఫార్మాట్‌లో కాకుండా డిఫరెంట్ కమర్షియల్ ఫార్మాట్‌లో సినిమాను తెరకెక్కిస్తున్నామని ఆయన అన్నాడు. రాజ‌శేఖ‌ర్‌తో తనకు ఎలాంటి గొడవలు లేవనీ, సెట్స్ లో ఆయన చాలా జోకులు వేస్తారని, నవ్వుతూ పని చేస్తున్నానని ప్రశాంత్ వర్మ తెలిపాడు.
