హనుమాన్ తో పాన్ ఇండియా విజయాన్ని అందుకున్నాడు ప్రశాంత్ వర్మ. సంక్రాంతికి విడుదలైన ఈ సినిమా బాక్సాఫీసు వద్ద సునామీ సృష్టించింది. యువ నటుడు తేజ సజ్జా మూడు వందలకోట్ల మార్క్ అందుకున్నాడు. ఈ సినిమాకి సీక్వెల్ గా జై హనుమాన్ పనులు మొదలుపెట్టారు ప్రశాంత్ వర్మ.
జై హనుమాన్ సినిమాలో కన్నడ హీరో రిషభ్ శెట్టి లీడ్ రోల్ చేస్తారని వార్తలు వినిపించాయి. ఇప్పుడు అధికారికంగా ఖరారైయింది. జై హనుమాన్ లో రిషభ్ శెట్టినే హీరో. కాంతార తో పాన్ ఇండియా ఫేం తెచ్చుకున్న రిషభ్ శెట్టి ఇప్పుడీ పాన్ ఇండియా సక్సెస్ ఫుల్ మూవీ సీక్వెల్ లో భాగం కావడం ఓ క్రేజీ ఫ్యాక్టర్.
ఈ సీక్వెల్ ని మైత్రీ మూవీ మేకర్స్ నిర్మిస్తోంది. హనుమాన్ సినిమాని నిర్మాణ పరంగా కొన్ని పరిమితులతో తెరకెక్కించారు ప్రశాంత్ వర్మ. ఇప్పుడు ఈ సీక్వెల్ కి మైత్రీ మూవీ మేకర్స్ లాంటి పెద్ద సంస్థ, రిషభ్ శెట్టి లాంటి హీరో తోడవ్వడంతో బడ్జెట్ విషయంలో ప్రశాంత్ వర్మ విజన్ కి లిమిట్ వుండకపోవచ్చు. ఈ సీక్వెల్ ని సెట్స్ పైకి తీసుకెళ్లడానికి శరవేగంగా ఏర్పాట్లు చేసుకుంటున్నారు ప్రశాంత్ వర్మ.
