బాహుబ‌లి 2లో కొత్త పాత్ర‌లు ప్ర‌వేశించ‌బోతున్నాయ‌ని ముందే హింట్ ఇచ్చేశాడు రాజ‌మౌళి! అప్ప‌టి నుంచీ.. బాహుబ‌లి 2లో ఫ‌లానా క‌థానాయిక న‌టిస్తోంద‌ట.. అంటూ బోల్డ‌న్ని పుకార్లు చ‌క్క‌ర్లు కొట్టాయి. వాట‌న్నింటినీ రాజ‌మౌళి అండ్ కో ఎప్ప‌టిక‌ప్పుడు ఖండిస్తూ వ‌చ్చేది. ఇప్పుడు బాహుబ‌లి 2 షూటింగ్ స్పాట్‌లోనే ఓ క‌థానాయిక క‌నిపించింది. ఆమెకూ బాహుబ‌లి 1కీ ఏమాత్రం సంబంధం కూడా లేదాయె. ఇంత‌కీ ఆమె ఎవ‌రో కాదు.. ప్రియ‌మ‌ణి. ప్ర‌స్తుతం బాహుబ‌లి 2 షూటింగ్ రామోజీ ఫిల్మ్‌సిటీలో జ‌రుగుతోంది. అక్క‌డ… బాహుబ‌లి క్లైమాక్స్ స‌న్నివేశాల్ని తెర‌కెక్కిస్తున్నారు. సెట్లో చిత్ర‌బృందంతో పాటు.. ప్రియ‌మ‌ణి కూడా క‌నిపించింది.
ఇది వ‌ర‌కు రాజ‌మౌళి తీసిన య‌మ‌దొంగ‌లో ఓ క‌థానాయిక‌గా న‌టించింది ప్రియ‌మ‌ణి. అప్ప‌టి నుంచీ రాజ‌మౌళి టీమ్‌తో ఆమెకు మంచి అనుబంధ‌మే ఉంది. ఆ అనుబంధంతోనే ప్రియ‌మ‌ణి సెట్‌కి వెళ్లింద‌ని కొంద‌రు.. ‘కాదు.. కాదు.. ప్రియ‌మ‌ణికి ఈ సినిమాలో ఓ క్యారెక్ట‌ర్ ద‌క్కింద’ని మ‌రి కొంద‌రు చెబుతున్నారు. అయితే అటు ప్రియ‌మ‌ణిగానీ, ఇటు రాజ‌మౌళి గానీ ఈ విష‌యంలో నోరు మెద‌ప‌డం లేదు. ప్రియ‌మ‌ణి స‌ర‌దాగానే సెట్‌కి వెళ్లిందా, లేదంటే ఏమైనా మేట‌రుందా?? తెలియాలంటే కొన్ని రోజులైగా ఆగాల్సిందే.
