కేంద్ర పట్టణాభివృద్ధి శాఖ మంత్రి వెంకయ్య నాయుడు ఇవ్వాళ్ళ లోక్ సభలో మాట్లాడుతూ “దేశంలో పంజాబ్ వంటి అభివృద్ధి చెందిన రాష్ట్రాలు సైతం ప్రత్యేక హోదా కోరుతున్నాయని అది తగదు. ప్రత్యేక హోదా కోసం దేశంలో చాలా రాష్ట్రాలు పోటీ పడుతున్నాయి. దేశ సమగ్రతను, అభివృద్ధిని అన్ని రాష్ట్రాలు దృష్టిలో పెట్టుకొని పనిచేయాలి. ఆంధ్రప్రదేశ్ రాష్ట్రానికి రెవెన్యూ లోటు ఉన్నందునే నేను ఏపీకి ప్రత్యేక హోదా అడుగుతున్నాను. రాష్ట్ర విభజన కారణంగా తీవ్రంగా నష్టపోయిన ఆంధ్రప్రదేశ్ రాష్ట్రం మళ్ళీ తన కాళ్ళ మీద తను నిలబడాలంటే వేగంగా అభివృద్ధి చెందాలి. అందుకే దానికి ప్రత్యేక హోదా అవసరం. కానీ ఆ ప్రతిపాదన ఇంకా నీతి ఆయోగ్ పరిశీలనలో ఉంది,” అని అన్నారు.
ఆంధ్రప్రదేశ్ రాష్ట్రానికి ప్రత్యేక హోదా కావాలని కోరుకొనేవారిలో వెంకయ్య నాయుడు ప్రప్రధముడు. అందుకోసం తన శక్తివంచన లేకుండా ప్రయత్నం చేసారు. కానీ ఇప్పుడు ఆయన చెపుతున్న కారణాల వల్లనే ఆంధ్రప్రదేశ్ రాష్ట్రానికి ప్రత్యేక హోదా దక్కడం లేదని మరోమారు స్పష్టం అయ్యింది. కానీ రాష్ట్రానికి ప్రత్యేక హోదా ఇస్తామని బీజేపీ, ప్రధాని నరేంద్ర మోడి కూడా హామీ ఇచ్చి ఉన్నందున, ఇప్పుడు ఇవ్వలేమని కుండ బద్దలు కొట్టినట్లు చెపితే, దాని వలన రాష్ట్రంలో బీజేపీకి తీరని నష్టం వాటిల్లుతుంది. ఈ సమస్యకు తరుణోపాయంగా దానిని తీసుకు వెళ్లి నీతి ఆయోగ్ టేబిల్ మీద పడేసి మోడీ చేతులు దులుపుకొన్నారు. నీతి ఆయోగ్ అధికారులు ఆ ప్రతిపాదనను భద్రంగా ప్యాక్ చేసేసి అటక మీద పడేశారు. కనుక ప్రధాని నరేంద్ర మోడి లేదా వెంకయ్య నాయుడు రాష్ట్రానికి ప్రత్యేక హోదా ఇస్తామని కానీ ఇవ్వమని గానీ ఖచ్చితంగా చెప్పరు. కానీ ఇవ్వడం సాధ్యం కాదనే విషయం ఏదో ఒక సందర్భంలో ఏదో ఒక విధంగా చెపుతూనే ఉన్నారు. ప్రజలే అర్ధం చేసుకోవాలి మరి. బహుశః మళ్ళీ వచ్చే ఎన్నికల సమయంలో ప్రత్యేక హోదా అంశాన్ని అటకమీద నుండి దుమ్ము దులుపి దించి, మళ్ళీ మరోమారు తమకే ఓటేస్తే ఈసారి తప్పకుండా ప్రత్యేక హోదా ఇచ్చేస్తామని హామీ ఇస్తారేమో?
