ఎట్ట‌కేల‌కు ‘పుష్ప 2’ ఈరోజు లాంఛ‌నంగా మొద‌లైంది. ఈ సినిమాకి సంబంధించిన స్క్రిప్టు ని సుకుమార్ లాక్ చేసేశాడు. ఇక షెడ్యూల్ పక్కా చేసుకొని, షూటింగ్ మొద‌లెట్ట‌డ‌మే త‌రువాయి. దేవిశ్రీ ప్ర‌సాద్ తో ఇటీవ‌ల యూర‌ప్ లో మ్యూజిక్ సిట్టింగ్స్ కూడా పూర్తి చేసుకొచ్చాడు సుకుమార్‌. దేవికి పూర్తిగా క‌థ చెప్ప‌క‌పోతే.. ట్యూన్లు ఇవ్వ‌లేడు. కాబ‌ట్టి.. దేవిని కూర్చోబెట్టి పూర్తిగా క‌థ వినిపించేశాడు. అక్క‌డికక్క‌డే మూడు రోజుల్లో, మూడు ట్యూన్ల‌ని దేవి సిద్ధం చేశాడు. చంద్ర‌బోస్ కూడా అక్క‌డే ఉండ‌డంతో.. పాట‌ల‌కు లిరిక్ కూడా సిద్ధ‌మైపోయింద‌ని స‌మాచారం. ఈ మూడు పాట‌ల్లో ఓ ఐటెమ్ గీతం కూడా ఉండ‌డం విశేషం. పుష్ప‌లో `ఊ అంటావా..` పాట ఎంత హిట్ అయిందో తెలిసిందే. స‌మంత చేయ‌డంతో ఆ పాట‌కు మ‌రింత క్రేజ్ వ‌చ్చింది. పుష్ప 2లోనూ ఓ ఐటెమ్ పాట ఉంటుంద‌ని ముందు నుంచీ జ‌నాలు అనుకొంటూనే ఉన్నారు. అయితే ఈ పాట కోసం ఏ హీరోయిన్ ని తీసుకొంటార‌న్న‌ది పెద్ద ప్ర‌శ్న‌. ఈసారి సుకుమార్ మాత్రం బాలీవుడ్ క‌థానాయిక‌నే రంగంలోకి దింపుతాడ‌ని ప్ర‌చారం జ‌రుగుతోంది. ప్ర‌స్తుతం ఒక‌ట్రెండు పేర్లు కూడా ప‌రిశీల‌న‌లో ఉన్నాయ‌ట‌. పుష్ప 2కి సంబంధించిన షూటింగ్ పార్ట్ అంతా అయ్యాకే.. ఐటెమ్ గాళ్ ని ఎంపిక చేయాల‌ని సుకుమార్ భావిస్తున్నాడు.