డిసెంబ‌రు 6న ‘పుష్ష 2’ వ‌స్తుంద‌ని అంతా ఫిక్స‌యిపోయారు. అంత‌కు ముందు రోజు.. అంటే 5న ప్రీమియ‌ర్లు ఉంటాయ‌న్న సంగ‌తి తెలిసిందే. కానీ ఇప్పుడు నిర్మాత ప్లాన్ మారింద‌ని తెలుస్తోంది. డిసెంబ‌రు 5న పుష్ష 2ని రిలీజ్ చేసి, 4 నుంచే ప్రీమియర్ షోలు వేయాల‌ని భావిస్తున్నారు. రేపు (గురువారం) హైద‌రాబాద్ లో పుష్ష ప్రెస్ మీట్ జ‌ర‌గ‌బోతోంది. మైత్రీ మూవీస్ నిర్మాత‌లు ఈ కార్య‌క్ర‌మానికి హాజ‌రవుతారు. అల్లు అర్జున్‌, సుకుమార్ వ‌చ్చే అవ‌కాశం లేదు. ఈ ప్రెస్ మీట్ లో రిలీజ్ డేట్ పై త‌మ నిర్ణ‌యాన్ని తెలియ‌జేస్తార‌ని స‌మాచారం.
పుష్ష 2కి విప‌రీత‌మైన బ‌జ్ ఉంది. ఈ నేప‌థ్యంలో ప్ర‌మోష‌న్ల‌నూ గ్రాండ్ గా చేయాల‌ని భావిస్తున్నారు. రేప‌టి నుంచే… ప్ర‌మోష‌న్ కార్య‌క్ర‌మాలకూ శ్రీ‌కారం చుట్ట‌బోతున్నారు. దీపావ‌ళి సంద‌ర్భంగా ‘పుష్ష 2’ నుంచి ఓ స‌ర్‌ప్రైజ్ ఉండ‌బోతోంద‌ని టాక్‌. ఆ విష‌యం కూడా ప్రెస్ మీట్ లో రివీల్ చేసే అవ‌కాశం ఉంది. పుష్ష‌కు సంబంధించిన టాకీ దాదాపుగా పూర్త‌య్యింది. రెండు పాట‌లు బాకీ ఉన్నాయి. ఆ రెండు పాట‌ల్లో ఒకటి ఐటెమ్ సాంగ్. న‌వంబ‌రులో ఈ పాట‌ని తెర‌కెక్కిస్తారు. శ్ర‌ద్దాక‌పూర్ ఈ పాట‌లో క‌నిపించే అవ‌కాశం ఉంది. ఇప్ప‌టికే ‘పుష్ష 2’ బిజినెస్ రూ.1000 కోట్ల మార్క్ దాటింద‌ని ట్రేడ్ వ‌ర్గాలు చెబుతున్నాయి. ఆ లెక్క‌లు నిర్మాత‌లు రివీల్ చేసే అవ‌కాశం లేదు. కాక‌పోతే.. ఏ స్థాయిలో బిజినెస్ జ‌రిగింద‌న్న విష‌యంలో నిర్మాత‌లు ఓ క్లారిటీ ఇచ్చే అవ‌కాశం ఉంది.
