దేశ‌మంతా పుష్ప రాజ్ రాక కోసం ఎదురు చూస్తోంది. డిసెంబ‌రు 5న ఈ చిత్రం ప్రేక్ష‌కుల ముందుకు రాబోతోంది. 4న ఓవ‌ర్సీస్ లో, 5 తెల్ల‌వారుఝామున ఇండియాలో ప్రీమియ‌ర్లు ప‌డ‌బోతున్నాయి. ఈరోజు హైద‌రాబాద్ లో నిర్మాత‌లు, డిస్టిబ్యూట‌ర్లు క‌లిసి ఓ ప్రెస్ మీట్ నిర్వ‌హించారు. ఈ మీట్ లో అంద‌రిదీ ఒక‌టే మాట‌. ‘పాత రికార్డులు అన్నీ బ‌ద్ద‌లు కొట్ట‌బోతున్నాం’ అని. తెలుగు నాట ‘పుష్ప 2’ కొత్త రికార్డులు సృష్టించ‌డం దాదాపు ఖాయ‌మైంది. ఇక మిగిలిన చోట్లా ఇదే ఫీట్ సాధిస్తామ‌ని డిస్టిబ్యూట‌ర్లు మైత్రీ మూవీస్ నిర్మాత‌ల‌కు మాట ఇచ్చారు. త‌మిళ‌, క‌న్న‌డ‌, హిందీ.. ఈ అన్నిచోట్లా పాత రికార్డుల్ని బ‌ద్ద‌లు కొట్టేలా పుష్ప రిలీజ్ ప్లాన్ చేస్తున్నామ‌ని డిస్టిబ్యూట‌ర్లు ముక్త‌కంఠంతో చెప్పారు.

త‌మిళ‌నాట తొలి రోజు వ‌సూళ్ల‌లో `గోట్‌`దే రికార్డు. ఈ సినిమా ఎన్ని థియేట‌ర్ల‌లో, ఎన్ని స్క్రీన్‌ల‌లో విడుద‌ల చేశారో, పుష్ప కూడా అన్నే థియేట‌ర్ల‌లో అన్నే స్క్రీన్స్‌లో రిలీజ్ చేస్తున్నారు. ఒక్క త‌మిళ‌నాటే కాదు, అన్నిచోట్లా ఇదే ప్లాన్. ‘పుష్ప‌’ సాధించిన క్రేజ్ తో తొలి రోజు వ‌సూళ్ల దుమ్ము దుల‌ప‌డం ఖాయ‌మైంది. తొలిరోజు వ‌సూళ్ల‌లో పాత రికార్డుల్ని బ‌ద్ద‌లు కొట్ట‌డ‌మ‌మే ‘పుష్ప‌’ టార్గెట్ అనే సంకేతాల్ని ఈ ప్రెస్ మీట్ ద్వారా చిత్ర‌సీమ‌కు పంపించింది మైత్రీ మూవీస్. తొలిరోజు ఎన్ని వ‌సూళ్లు చేయ‌బోతున్నాం అనేది అంకెల ప‌రంగా మైత్రీ మూవీస్ చెప్ప‌డం లేదు కానీ, అల్ టైమ్ రికార్డుకు రంగం మాత్రం గ‌ట్టిగానే ప్రిపేర్ చేశార‌న్న సంగ‌తి అర్థ‌మ‌వుతోంది.