హైదరాబాద్: టాలీవుడ్‌లో ఇటీవలి కాలంలో వర్ధమాన హీరోలు సాయి ధరమ్‌ తేజ్, రాజ్‌ తరుణ్ కొద్ది కాలంలోనే మంచి రేంజ్‌లోకి వెళ్ళిపోయారు. సాయి ధరమ్ తేజ్ మెగా ఫ్యామిలీ అండతో వచ్చాడు… కానీ రాజ్ తరుణ్ ఎవరి అండా లేకుండానే మంచి రేంజ్‌లోకి వెళ్ళి పోవటం విశేషం. మొదటి చిత్రం ‘ఉయ్యాల-జంపాల’ హిట్ అయినాకూడా ఆ క్రేజ్‌ను ఉపయోగించుకుని ఇష్టమొచ్చినట్లు చిత్రాలను ఒప్పుకోకుండా, ఆచి తూచి అతను చిత్రాలను ఎంచుకుంటున్నాడు. అందుకనే రెండో చిత్రం ‘సినిమా చూపిస్త మావ’ కూడా హిట్ అయింది. అగ్ర దర్శకుడు సుకుమార్ నిర్మాణంలో రాజ్ తరుణ్ మూడో చిత్రం ‘కుమారి 21F’ విడుదలకు సిద్ధమయింది. ఇదిలా ఉంటే, సుప్రసిద్ధ నిర్మాణ సంస్థ గీతా ఆర్ట్స్‌లో కూడా రాజ్ తరుణ్ బుక్ అయ్యాడు. గీతా ఆర్ట్స్ అంటేనే హయ్యెస్ట్ సక్సెస్‌ఫుల్ బ్యానర్ అన్న విషయం తెలిసిందే. ఇటీవలే ఆ బ్యానర్‌లో భలే భలే మగాడివోయ్ అనే హిట్ వచ్చింది. అలాంటి బ్యానర్‌లో బుక్ అయ్యి రాజ్ తరుణ్ జాక్ పాట్ కొట్టేశాడు. దీనితో పాటు రాంగోపాల్ వర్మ దర్శకత్వంలోకూడా చేయబోతున్నాడు. లేడీస్ టైలర్ సీక్వెల్‌లో వంశీ దర్శకత్వంలో నటించబోతున్నాడు. మంచు విష్ణుతో కలిసి ఓ మల్టీ స్టారర్ చిత్రంలో చేయబోతున్నట్లు చెప్పాడు. ‘సీతమ్మ అందాలు రామయ్య సిత్రాలు’ అనే చిత్రం కూడా విడుదలకు సిద్ధమవుతోంది. మొత్తం మీద రాజ్ తరుణ్ మంచి ఫామ్‌లో ఉన్నాడు.