ఎవరైనా నక్క తోక తొక్కారని అంటారు కాని విచిత్రంగా లక్కు తోక తొక్కడం ఏంటని అందరు ఆశ్చర్యపడవచ్చు. ప్రస్తుతం రాజ్ తరుణ్ గురించి తెలిసిన వారు ఎవరైనా ఇలానే అంటారు. హీరోగా సూపర్ సక్సెస్ మీదున్న రాజ్ తరుణ్ అసలు తాను హీరో అవడానికి పరిశ్రమకు రాలేదని దర్శకత్వం చేయడం తన కల అని ఈమధ్య ఇచ్చిన ఇంటర్వ్యూలో చెప్పాడు. అయితే మనోడు అలా అన్నాడో లేదో వర్మ తనకు దర్శకత్వం చేసే అవకాశం ఇస్తున్నాడని తెలుస్తుంది.
ప్రస్తుతం రాజ్ నటిస్తున్న సినిమాల్లో వర్మ మూకీ సినిమా కూడా ఒకటి.. అయితే ఆ సినిమా షూటింగ్ సమయంలో రాజ్ దగ్గర దర్శకత్వ ప్రతిభను గమనించిన వర్మ తనకు దర్శకత్వం చేసే అవకాశం ఇస్తున్నాడని సమాచారం. వర్మ రాసిన కథను దర్శకత్వం చేయమని రాజ్ ని కోరాడట. అనుకోకుండా వచ్చిన ఈ అవకాశాన్ని అందిపుచ్చుకోవాలా లేక కాదనుకోవాలా తెలియక సంక్షోభంలో ఉన్నాడు రాజ్ తరుణ్.
నటించిన మూడు సినిమాలు సూపర్ హిట్ చేసుకున్న రాజ్ కొంతకాలం హీరోగానే కొనసాగితే బాగుంటుందని అభిప్రాయపడుతున్నారు అతని సన్నిహితులు. మరి అయితే వర్మ ఇచ్చిన అవకాశం కూడా గొప్పది కావడం చేత అటు కూడా మొగ్గు చూపే అవకాశం ఉంది. మరి రాజ్ నిర్ణయం ఎలా ఉండబోతుందో తెలియాలంటే కొద్దిరోజులు వెయిట్ చేయాల్సిందే..!
