రాజ్ త‌రుణ్‌కి హిట్టు ప‌డి చాలా ఏళ్ల‌య్యింది. అయితే అవ‌కాశాల‌కు మాత్రం కొద‌వ లేదు. ఏదో ఓ సినిమా వ‌స్తూనే ఉంది. వెబ్ సిరీస్ కూడా చేశాడు. పారితోషికం త‌గ్గించుకోవ‌డం, నిర్మాత‌ల‌కు అందుబాటులో ఉండ‌డం, ఓటీటీల హ‌వా పెర‌గ‌డం, ముఖ్యంగా హీరోల‌కు కొర‌త ఉండ‌డంతో… రాజ్ త‌రుణ్‌కి ఇంకా అవ‌కాశాలు అందుతూనే ఉన్నాయి. తాజాగా మ‌రో సినిమా రాజ్ త‌రుణ్ ఖాతాలో చేరింది. ఈ సినిమాకి ద‌ర్శ‌కుడు మారుతి బ్యాక్ బోన్‌గా నిల‌వ‌డం విశేషం.

మారుతి క‌థ‌తో… ఓ సినిమా తెర‌కెక్క‌నుంది. ఇందులో రాజ్ త‌రుణ్ హీరో. సాయి వ‌ర్థ‌న్ ద‌ర్శ‌కుడిగా ప‌రిచ‌యం అవుతున్నాడు. ఇది వ‌ర‌కు గీతా సుబ్ర‌హ్మ‌ణ్యం అనే వెబ్ సిరీస్ రూపొందించాడు సాయి వ‌ర్థ‌న్‌. దానికి మంచి స్పంద‌న వ‌చ్చింది. ఈ వెబ్ సిరీస్ తో సాయి త‌న ప‌నితీరు న‌చ్చి, మారుతి పిలిచి మ‌రీ ఈ ఛాన్స్ ఇచ్చాడ‌ట‌. మారుతి స్టోరీల‌న్నీ చిత్ర విచిత్రంగా ఉంటాయి. భ‌లే భ‌లే మగాడివోయ్‌, మ‌హానుభావుడు లా ఈ క‌థ కూడా హీరో క్యారెక్టరైజేష‌న్ చుట్టూ తిర‌గ‌బోతోంద‌ని టాక్. మే మొద‌టి వారంలో షూటింగ్ ప్రారంభం కాబోతోంది. నిర్మాత‌, ఇత‌ర వివ‌రాలు త్వ‌ర‌లోనే బ‌య‌ట‌కు వ‌స్తాయి.