రాజ‌మౌళి ఇప్పుడు ఆల్ ఇండియా స్టార్ అయిపోయాడు. మోస్ట్ వాంటెడ్ ద‌ర్శ‌కుడిగా మారిపోయాడు. రాజ‌మౌళితో సినిమా చేయాల‌ని టాలీవుడ హీరోలంతా క‌ల‌లు క‌న‌డం మామూలే. ఇప్పుడు మెగాస్టార్లూ, సూప‌ర్ స్టార్లూ ఆ జాబితాలో చేరిపోయారు. బాహుబ‌లి 2 కూడా ప్ర‌భంజనాలు సృష్టిస్తుండ‌డంతో రాజ‌మౌళితో సినిమా చేయాల‌ని ఆశ‌ప‌డుతున్న వాళ్ల లిస్టు పెరుగుతూపోతోంది. తాజాగా ఈ జాబితాలో ర‌జ‌నీకాంత్ కూడా చేరిపోయిన‌ట్టు తెలుస్తోంది. ఈగ స‌మ‌యంలోనే రాజ‌మౌళి ప్ర‌తిభ చూసి ముగ్థుడైపోయాడు ర‌జ‌నీకాంత్. బాహుబ‌లి సిరీస్‌ల‌తో ఆ ప్రేమ మ‌రింత పెరిగింద‌ట‌. బాహుబ‌లి 2 చూసి జ‌క్క‌న్న‌ను అభినంద‌న‌ల‌తో ముంచెత్తాడు ర‌జ‌నీకాంత్‌. ఎవ‌రి పొగ‌డ్త‌ల‌కూ ప‌డిపోని రాజ‌మౌళి, ర‌జ‌నీ కామెంట్ల‌కు ఆస్కార్ వ‌చ్చినంత సంబ‌ర ప‌డుతున్నాడు. ఇప్పుడు స్వ‌యంగా ర‌జ‌నీకాంతే.. ‘మ‌నం క‌ల‌సి సినిమా చేయాలి’ అంటూ రాజ‌మౌళిని కోరిన‌ట్టు స‌మాచారం.

ఇటీవ‌ల కొంత‌మంది త‌మిళ నిర్మాత‌లు రాజ‌మౌళిని సంప్ర‌దించార్ట‌. ‘ర‌జ‌నీకి త‌గిన క‌థ ఉంటే చెప్పండి’ అన్నార్ట‌. పారితోషికం కూడా భారీ స్థాయిలో ముట్ట‌జెప్ప‌డానికి స‌ముఖంగా ఉన్నార‌ని, పైగా ర‌జ‌నీకాంత్ నుంచి ఆఫ‌ర్ అనేస‌రికి రాజ‌మౌళి కూడా బాగా టెంప్ట్ అయ్యాడ‌ని తెలుస్తోంది. ర‌జ‌నీకాంత్‌కి త‌గిన క‌థ‌లు రాజ‌మౌళి ద‌గ్గ‌ర ఆల్రెడీ ఉన్నాయ‌ని స‌మాచారం. విజ‌యేంద్ర‌ప్ర‌సాద్ ఓ మాస్ క‌థ‌ని ఎప్పుడో త‌యారు చేశాడ‌ని, అయితే.. అందుకు త‌గిన స‌మ‌యం కోసం రాజ‌మౌళి కాచుకొని కూర్చున్నాడ‌ని తెలుస్తోంది. బాహుబ‌లి 2 త‌ర‌వాత విజువ‌ల్ ఎఫెక్ట్స్‌తో ప‌ని ప‌డిన సినిమాలకు కొంత గ్యాప్ ఇస్తాన‌ని రాజ‌మౌళి ముందే చెప్పాడు. క‌చ్చితంగా ఈసారి సింహాద్రి, చ‌త్ర‌ప‌తి రేంజులో హీరోయిజం పుష్క‌లంగా ఉన్న మాస్ క‌థ‌కి ఓటేస్తాడు. అలాంటి క‌థ‌ల‌కు ర‌జ‌నీకాంత్ బాగా స‌రిపోతాడు. అయితే బాహుబ‌లి త‌ర‌వాత త‌న సినిమాల‌పై మ‌రింత‌గా అంచ‌నాలు పెరుగుతాయి. పైగా ర‌జ‌నీకాంత్ యాడ్ అయితే… మ‌రింత ఒత్తిడి పెరుగుతుంది. అందుకే..ర‌జ‌నీ సినిమా కోసం కొంత టైమ్ తీసుకోవాల‌ని భావిస్తున్నాడ‌ట‌. అయితే ర‌జ‌నీకాంత్ మాత్రం ‘రోబో 2’త‌ర‌వాత మ‌నం చేస్తున్నాం… అన్న‌ట్టు సంకేతాలు పంపిస్తున్నాడ‌ని తెలుస్తోంది. మ‌రి ఏం జ‌రుగుతుందో చూడాలి.