టాలీవుడ్ లో డ్ర‌గ్స్ క‌ల‌క‌లం ఎప్పుడు రేగినా ర‌కుల్ ప్రీత్ సింగ్ పేరు వినిపించ‌డం ప‌రిపాటి మారింది. గ‌తంలో డ్ర‌గ్స్ డీల‌ర్ల కాల్ లిస్టులో ర‌కుల్ ప్రీత్ సింగ్ పేరు ఉండ‌డంతో అధికారులు ఆమెను విచారించారు. ఇప్పుడు మ‌రోసారి డ్ర‌గ్స్ వ్య‌వ‌హారంలో ర‌కుల్ పేరు బ‌య‌ట‌కు వ‌చ్చింది. అయితే ప్ర‌త్య‌క్షంగా కాదు. ప‌రోక్షంగా.

ఈరోజు హైద‌రాబాద్ పోలీసులు కొంత‌మంది డ్ర‌గ్ డీలర్ల‌ను అదుపులోకి తీసుకొన్నారు. అందులో ర‌కుల్ ప్రీత్ సింగ్ సోద‌రుడు అమ‌న్ ప్రీత్‌సింగ్ కూడా ఉన్నాడు. అత‌ని ద‌గ్గ‌ర్నుంచి దాదాపు 200 గ్రాముల కొకైన్‌ని స్వాధీనం చేసుకొన్న‌ట్టు తెలుస్తోంది. ప్ర‌స్తుతం పోలీసులు అమ‌న్‌ని విచారిస్తున్నారు. అమ‌న్ టాలీవుడ్ లోని కొంత‌మంది ప్ర‌ముఖుల‌కు డ్ర‌గ్స్ స‌ర‌ఫ‌రా చేస్తున్న‌ట్టు పోలీసులు భావిస్తున్నారు. అమ‌న్ ద్వారా డ్ర‌గ్స్ ఎవ‌రెవ‌రికి వెళ్తున్నాయి? ఈ వ్య‌వ‌హారంలో ర‌కుల్ కు ఏమైనా లింకు ఉందా? అనే కోణం నుంచి ద‌ర్యాప్తు చేస్తున్నారు. అమ‌న్ గ‌తంలో హీరోగానూ ట్రై చేసిన విష‌యం గుర్తుండే ఉంటుంది. ‘నిన్నే పెళ్లాడ‌తా’ పేరుతో ఓ సినిమాలో న‌టించాడు. ఆ సినిమా ఫ్లాప్ అయ్యింది. ర‌కుల్ కు హైద‌రాబాద్ లో కొన్ని ఫిట్ నెస్ సెంట‌ర్లు ఉన్నాయి. ప్ర‌స్తుతం వాటి నిర్వ‌హ‌ణ బాధ్య‌త‌లు అమ‌న్ చూసుకొంటున్నాడు.